Фарғона вилояти ҳокими Хайрулло Бозоров Хитойнинг Shanxi Coal Investment Group компанияси вакилларини қабул қилди. Бу ҳақда вилоят ҳокимлиги матбуот хизмати хабар берди.
Маълум қилинишича, учрашувда Қувасой шаҳрида Хитой инвестицияси ҳисобига Қирғизистондан лентали конвеер тизими орқали йиллик 6 млн тонна сифатли ва арзон қирғиз кўмири етказиб бериш лойиҳаси муҳокама қилинди.
Дастлабки қиймати 60 млн доллардан зиёд бўлиши кутилаётган ушбу лойиҳа доирасида Ўзбекистон ва Қирғизистон чегарасида ҳар икки томонда иккитадан йирик кўмир сақлаш омбори ташкил этиш ҳамда уларни эни 1,4 метр, узунлиги 1,5 км бўлган лентали конвеер тизими билан боғлаш режа қилинган. Ушбу усулда йиллик 6 млн тонна сифатли ва арзон қирғиз кўмирини вилоятимизга етказиб бериш имкони яратилади.
Shanxi Coal Investment Group компанияси ҳамда “Киргизкомур” давлат корхонаси ўртасида ўтган 2023 йилда Урумчида имзоланган икки шартномага кўра, ушбу компания Қирғизистондаги Ак-Улак ва Беш-Бурхан конларидан кўмир қазиб олиш ҳуқуқини қўлга киритган.
2023 йилда Фарғонага жами 1,1 млн. тонна кўмир олиб келинганини маълум қилган Хайрулло Бозоров, лойиҳа бўйича кўзда тутилган қувват республиканинг қолган вилоятлари талабини ҳам қондиришга хизмат қилишини таъкидлади.
Лойиҳани амалга ошириш бўйича техник талабларни ишлаб чиқишда чегара хизмати, божхона ва экология тизимлари мутасаддилари билан ҳамкорликда иш ташкил этишга келишиб олинди.
Изоҳ (0)