Европа Иттифоқининг ташқи сиёсат ва хавфсизлик масалалари бўйича олий вакили Кая Каллас Украина ҳудудларининг русларга берилиши бўйича ҳар қандай келишувни “Россиянинг тузоғи” деб атади. Бу ҳақда Anadolu хабар берди.
Кая Каллас BBC нашрига берган интервьюсида Россия урушни бошлаганини ва ҳозиргача ҳеч қандай муросага келмаётганини таъкидлаган.
“Бу айнан Россия бизни туширмоқчи бўлган тузоқдир. Муҳокамаларда фақатгина Украина нимадан воз кечиши кераклигига урғу берилган. Россиянинг эса ҳеч қандай ён беришга тайёр эмаслиги унутилмоқда. Асл тажовузкор — Россиядир. Путин кулмоқда — у ўлимларни тўхтатмаяпти, аксинча, кўпайтирмоқда”, деди Каллас.
Каллас 15 август куни Аляскада бўлиб ўтган АҚШ президенти Дональд Трамп ва Россия раҳбари Владимир Путин учрашувига ҳам муносабат билдирган. Унинг фикрича, Путин бу учрашувда ўзи хоҳлаганини олган ва бу унинг тинчлик музокараларига қизиқишини пасайтириши мумкин.
“Путин кутганидек илиқ кутиб олинди, санкциялар масаласида ҳам енгиллик олди. У шунчаки кулмоқда”, деди ЕИ расмийси.
Трамп Зеленский ва Европа етакчилари билан ҳам учрашди
АҚШ президенти Дональд Трамп 18 август куни Оқ уйда Украина президенти Владимир Зеленский ҳамда бир қатор Европа давлатлари етакчилари билан учрашган. Унда НАТО бош котиби Марк Рютте, Еврокомиссия раҳбари Урсула фон дер Ляйен, Франция президенти Эммануэл Макрон, Британия бош вазири Кир Стармер, Финляндия президенти Александр Стаб, Италия бош вазири Жоржа Мелони ва Германия канцлери Фридрих Мерс иштирок этган. Эслатиб ўтамиз, Трамп ва Путин ўртасидаги учрашув якунида ҳеч қандай якуний келишувга эришилмаганини АҚШ президенти расман эълон қилган.
Изоҳ (0)