Шимолий Корея Хитой чегарасидан 27 километр узоқликда махфий ракета базаси қургани айтилмоқда. Бу маълумот Вашингтондаги Стратегик ва халқаро тадқиқотлар маркази томонидан эълон қилинди.
Тадқиқотчиларга кўра, базада ядровий қурол ташишга қодир 6-9 та қитъалараро баллистик ракета (ICBM) ва уларнинг учириш мосламалари мавжуд. “Синпунг-донг ракета операцион базаси” деб номланаётган ҳудуд Шарқий Осиё мамлакатлари ҳамда АҚШга ядро хавфи туғдириши мумкин.
КХДР шу кунгача расмий равишда 15–20 та ракета объектидан бирортасини ҳам эътироф этмаган ва улар АҚШ билан денуклеаризация музокараларида тилга олинмаган. Ҳисоботда айтилишича, фавқулодда вазиятларда ракеталар базадан бошқа ҳудудларга кўчирилиши ва яширин тарзда ишга туширилиши мумкин.
Мутахассислар бу базани Пхеньяннинг ядро стратегияси ва зарба бериш салоҳиятини кенгайтиришдаги муҳим қадам сифатида баҳоламоқда. КХДР етакчиси Ким Чен Ин 2019 йилда АҚШ билан бўлган саммит муваффақиятсизликка учраганидан сўнг, мамлакат ядро арсеналини “тезкор кенгайтириш”га чақирган эди. Сўнгги йилларда Пхеньян ўзини тўлиқ ядровий давлат деб эълон қилган ҳамда Россия билан ҳарбий ҳамкорликни кучайтирмоқда.
Вашингтон Москвани Шимолий Кореядан аскар ва қурол олиб, бунинг эвазига илғор космик ва сунъий йўлдош технологияларини тақдим этаётганликда айблаб келади. Мутахассисларнинг таъкидлашича, сунъий йўлдош учириш технологияси ва ICBM технологияси ўзаро ўхшаш.
Изоҳ (0)