Бутун дунё бўйлаб мухлисларнинг қалбини забт этишга муваффақ бўлган ноодатий хонанда Мадонна жорий йил 16 август куни 66 ёшни қарши олди. У ажойиб вокал қобилиятига эга бўлган тарихдаги энг машҳур қўшиқчилардан бирига айланди. Хонанда ўз олдига муваффақиятга эришишни болалигиданоқ мақсад қилиб қўйди ва йўлидаги ҳар қандай тўсиқларга эътибор бермасдан, тизимли равишда ҳаракат қилди.
Ички зиддиятларга қарши кураш
Беш ёшида Мадонна онасидан айрилади — Мадонна Луиз Чикконе олтинчи фарзанди туғилгандан кўп ўтмай кўкрак саратонидан вафот этади. Хонанданинг сўзларига кўра, ўша пайтда у ўзини жаннатдан ҳайдалгандек ҳис қилган. Худдики у ёмон иш қилган-у, шунинг учун ундан энг қадрли инсони тортиб олинганди. Болаликдаги ёлғизлик ва ташландиқлик ҳисси уни кўп йиллар давомида таъқиб қилади. Ўшанда унинг ёнида фақат отаси бор эди — жажжи Мадонна отасининг айрилиқ азобини қандай юмшатишга ҳаракат қилганини эслайди. У дунёда унинг ҳис-туйғулари ҳақида қайғурадиган ягона одам эди. Икки йилдан кейин отаси яна уйланганида, қиз отасини янги хотинидан қизғанмайди. Қайтага унга ёрдам бера бошлайди. Отаси ҳар доим унинг истакларини қадрлаган, у қизига қандай миннатдорлик билдиришни билар эди.
Бошқа томондан, Мадонна болалигиданоқ ҳар доим отасининг кўнглини олишга ҳаракат қилган: Мадоннанинг ўзи 66 ёшда, отаси эса 92 ёш бўлса ҳам ҳалигача шундай. Хонанда отасини хафа қилишни хоҳламайди, шунинг учун ҳатто болалигида ҳам қийинчиликлари ҳақида гапирмаган. Тасаввур қилиш қийин, лекин болалигида Хонанданинг тенгдошлари уни унчалик яхши кўришмаган. Ўрта мактабга ўтганида эса бутунлай яккаланиб қолади, у умумэътироф этилган стандартлардан жуда фарқ қиларди. Ташқи кўринишидан миллионлаб қизларга ўхшарди, лекин ички дунёси билан улардан фарқланиб турарди.
Тенгдошлари уни уриб-калтаклашади, ҳақорат қилишади, устидан кулишади. Аммо у тенгдошларига юқоридан қарарди ва Густав Малер мусиқаси нақадар гўзал эканлигини билмаган одамлар қанчалик аҳамиятсиз деб ўйларди. Яхшиямки, ҳеч ким Мадоннанинг руҳини синдира олмайди ва тез орада унинг ҳаётига рақс санъати кириб келади. Бўлажак юлдуз рақсга боши билан шўнғийди ва бошқача бўлиш кераклиги ҳақида ўйлашни тўхтатади. Отаси ҳеч қачон унинг ўзини кўрсатишига тўсқинлик қилмаган, қизи хоҳламаган нарсаларга аралашмасликка ҳаракат қилган. У қизини борича яхши кўрарди.
Машҳурлик чўққиси сари
Мактабни тугатгандан сўнг, Мадонна Мичиган университетида балет бўйича таҳсил олади, лекин у минглаб раққосалардан бири бўлишни хоҳламаслигини тушунади. Ҳаммасини ташлаб, карьера қилиш умидида Нью Йоркка кетади. Аммо отаси қизини шифокор ёки адвокат сифатида кўришни хоҳларди. Шу сабабдан ҳам у барча қийинчиликларини отасига билдирмайди, ҳеч қачон нолимайди. Муваффақиятли карьерага эришгач, отаси билан муносабатларда юзага келган муаммоларни юмшатишга умид қилади.
Нью Йоркдаги биринчи йилларда Мадонна жуда муҳтожликда кун кечиради, ҳар қандай жойда ишлаб кўради: у санъат студиясида моделлик қилади ва ҳатто дўконда ширинликлар сотади.
Унинг 1982 йилда чиққан “Everybody” номли биринчи сингли танқидчилар эътиборига тушмайди, аммо Қўшма Штатларда ҳит бўлади. Бир йил ичида унинг “Holiday” қўшиғи Америка, Австралия ва Буюк Британиядаги мусиқий чартларга киради. Бу унинг машҳурлик сари биринчи қадами эди. Кейинчалик “Like” ва “Virgin” қўшиқлари Мадоннани Америка ҳит-парадининг биринчи қаторига кўтаради. Улар Мадонна феномени ҳақида гапира бошлашади.
Унинг ўзи ҳам ажойиб вокал қобилиятига эга эмаслигини бир неча бор айтади. У болалигида отасидан олган маслаҳатини умрининг охиригача ёдида сақлайди: агар ҳеч нарсага чалғимасдан, тўрт кун кетма-кет битта нарсани қилсанг, максимал натижага эришасан. Тўғри, муваффақиятга эришиш учун унга тўрт кундан кўпроқ вақт керак бўлди, лекин у доимо бу тамойилга амал қилади. Унинг иштирокидаги “Сюзан” фильми чиққанида, ҳатто у билан суратга олиш майдончасида ишлаган тажрибали актёрлар ҳам Мадоннанинг қобилиятидан ҳайратда қолишган. У ҳолдан тойганига қарамай, бирор саҳна ўхшамаса, уни қайта-қайта такрорларди.
Хонанда бирин-кетин бир-бирига ўхшамайдиган ҳит альбомлар чиқаради, у ҳар доим янги нарсаларни қидирарди. У ўрганишдан қўрқмасди ва агар бирор нарсани тушунмаса, доим мутахассисларга мурожаат қиларди. Бошқа машҳурлар спиртли ичимликлар ва гиёҳванд моддалар ёрдамида дам олаётганда, у спорт залида машқ қилади, ёга билан шуғулланади ва ноқонуний моддаларнинг яқинига ҳам йўламайди. Мадонна ўз қобилиятининг чегарасигача ишлайди ва унинг турмуш тарзи ишдан фарқли ўлароқ тинч ва осойишта эди.
У ичмасди, чекмасди, ҳашаматли зиёфатлар уюштирмасди ва бундан фахрланарди. Мадонна ҳеч қандай қарамликка тоқат қилмайди, бунга у телевизорни ҳам қўшади. Бугунги кунда ҳам у телевизорни тасаввурни чеклаш деб билади, шунинг учун у болаларига экран қаршисида кўп ўтиришга рухсат бермайди, гарчи у буни бутунлай тақиқламаган бўлса ҳам.
Ҳаётдаги энг устувор нарса
Мадонна — поп мусиқа соҳасининг ёрқин юлдузи. Хонанданинг сўзларига кўра, унинг барча инжиқликлари ва ғайриоддий жанжаллари шунчаки ўзини намоён қилишга уриниш бўлган. У миллионларнинг кумири, машҳур хонанда ва эркин аёл тимсолига айланган эди, аммо юрагининг туб-тубида бир вақтлар болалигида бўлгани каби яна жаннатдан ҳайдалишдан қўрққан қизалоқ бор эди.
Мадонна доимо босим остида эди, у ўзининг шон-шуҳратига ҳақиқатан ҳам ишонмасди, унинг қулоғидан ушлаб, танланганлар жамияти эшигидан олиб кетишларидан қўрқарди. Ҳар сафар қандайдир арзимас нарсалар туфайли жанжал уюштирганда хоҳиш-истаклари қондирилса, енгил тортарди. Кейин у бирдан машҳурликдан чарчади, шунчаки яшашни ва энг оддий нарсалардан завқланишни бошлади.
Ўшанда хонанда ўзи учун хулоса чиқарди: ҳеч кимни безовта қилмайди, ҳеч кимни қораламайди, ўз муаммолари учун бошқаларни айбламайди, узр сўрамайди ҳам. Кўп йиллар давомида у ушбу қонунга мувофиқ яшаб келмоқда. У бошқаларга ва ўзига ҳар нарсани исботлашни тўхтатди, маълум бир уйғунликка эришди ва жамоатчилик фикридан қатъи назар, бахтли бўлишни ўрганди.
2023 йил июнь ойи охирида гастрол сафарига ҳозирлик кўраётган Мадонна бактериал инфекция туфайли келиб чиққан септик шок билан реанимацияга тушганида яқинлари ва кўплаб мухлисларини жиддий қўрқитди. Бир неча кун давомида қўшиқчи ҳаёт ва ўлим ёқасида эди — оиласи энг ёмон оқибатларга ҳам тайёр турганди. Аммо Мадонна тузалиб кетгач, соғлиғига эътиборли бўла бошлади.
У жаҳон гастролларига тайёргарликни давом эттирди, аммо энди овқатланиш ва спорт мутахассисларининг маслаҳатларига кўпроқ аҳамият бера бошлади. У ногиронлар аравачасида саҳнага чиқишига тўғри келса ҳам, юбилей гастролларини амалга ошириш ниятида.
Изоҳ (0)