Telegram мессенжеридаги каналларда Тошкент давлат тиббиёт университети талабаларининг видеомурожаати эълон қилинди. Унда талабалар мажбурий равишда Россиянинг Нижний Новгород шаҳрига, ҳарбий ҳолат эълон қилинган ҳудудга ўқишга юборилаётганини айтиб, президентдан ёрдам сўрайди.
Биз Тошкент тиббиёт академиясининг Россиядаги Приволжский тиббиёт университети билан икки диплом дастури асосида таълим олаётган бешинчи босқич талабаларимиз. Биз учун бу сўнгги курс ҳисобланади. Ҳозирги хавфсизлик вазияти ва оилавий шароитлар туфайли 40 нафардан зиёд талабалар Россияга бориш имкониятига эга эмас. Айни пайтда бизга фақат икки йўл таклиф қилинмоқда: Россияга бориш ёки академик таътилга чиқиш, дейди талабалар давлат раҳбарига мурожаат қилар экан.
Мурожаатчилар муаммога ечим топиш мақсадида проректорга бир неча маротаба мурожаат қилганини, аммо натижа йўқлигини айтади.
Сиздан илтимос қиламиз, бизга бешинчи босқични Ўзбекистонда якунлаш имкониятини беринг, дейди улар.
Мазкур видеомурожаатга эътибор қаратган олийгоҳ масъуллари Тошкент давлат стоматология институти талабаларининг мажбуран ҳарбий ҳаракатлар ҳудудига юборилаётганини рад қилди.
Мазкур ҳолатда тилга олинаётган барча талабалар ҳамкорликдаги қўшма таълим дастурига ўқишга қабул қилинган. Бунга кўра, улар ўз ўқишларини хориждаги ҳамкор олий таълим муассасасида давом эттиришлари шарт ҳисобланади. Ҳар бир талабалар билан шартнома тузилган бўлиб, унга мувофиқ улар 4- ва 5-курсни Россиянинг Нижний Новгород шаҳрида жойлашган Приволжский тиббиёт тадқиқот университетида (ПИМУ) ўқиб тугатиш мажбуриятини олган. Ҳозирда ПИМУ Ўзбекистоннинг 5 та олий ўқув юрти билан 12 та ҳамкорликдаги дастурни амалга оширмоқда. Ушбу дастурлар доирасида бугунги кунда 400 дан ортиқ Ўзбекистон фуқароси ПИМУ базасида кундузги шаклда ўқимоқда, дейилади масъуллар раддиясида.
Қўшимча қилинишича, талабалар учун қулай шароитлар яратиш мақсадида Тошкент давлат тиббиёт университети ректори Боймуродов ПИМУ ректори Карякин билан бир нечта келишувларни амалга оширган.
Ҳамкорлик дастури бўйича ўқиётган барча ўзбекистонлик талабалар учун алоҳида ётоқхона ажратиш, илгари шартнома шартларини бажармаган ва ПИМУ томонидан ўқишдан четлаштирилган талабалар учун академик йилни йўқотмасдан ўқишга қайта тикланиш имкониятини яратиш, ПИМУ томонидан ҳамкорлик дастури талабалари учун уларни қўллаб-қувватловчи — яъни аэропортдан кутиб олиб, Россияда яшаш учун зарур барча ҳужжатларни расмийлаштиришда ёрдам берадиган деканат фаолиятини юритишга келишиб олинган, дейилади ОТМ баёнотида.
Қўшимча қилинишича, Вазирлар Маҳкамасининг 421-сон қарорига асосан ушбу қўшма таълим дастурларига ўқишга қабул қилиш бўйича кириш имтиҳонлари енгиллаштирилган ҳолда амалга оширилган ва талабаларнинг ўқишини Қозоғистонга кўчириш ҳақидаги маълумотлар асосли эмас.
Бундан ташқари Нижний Новгород шаҳри ҳақида тарқатилган “ҳарбий ҳолат эълон қилинган ҳудуд” деган маълумот ҳам асоссиздир. Россия Федерациясининг мазкур ҳудудида расмий тартибда ҳарбий ҳолат эълон қилинмаган. Ушбу шаҳар университет билан илмий ва таълимий ҳамкорлик қилаётган шерик олий таълим муассасалари жойлашган ҳудуд ҳисобланади. 2025 йил 11 август куни Тошкент давлат тиббиёт университети ректори Ш.Боймурадов ушбу қўшма таълим дастурида таҳсил олаётган ҳар бир талаба ва уларнинг ота-оналари билан учрашув ўтказди. Учрашув давомида талабаларни ҳамкор ПИМУда ўқишни давом эттириш учун жўнаб кетиши, у ерда яратилган шарт-шароитлар ва талабалар турар жойи билан таъминлаш бўйича батафсил маълумотлар берилди. Дастур иштирокчиларининг асосий қисми ПИМУда таълимни давом эттириш истагини билдириб, улардан аксарияти жўнаб кетишга тайёр эканини билдирди. Фақат айрим талабалар шартнома шартларини бузган ва атайлаб ёлғон маълумотларга таянган ҳолда, Тошкентда қолишга ҳаракат қилмоқда, дейди масъуллар.
Изоҳ (0)