Президент Дональд Трамп маъмурияти АҚШ визасига эга 55 миллиондан ортиқ хорижликни ноқонуний ҳаракатлар содир этганини текшириш юзасидан доимий текширув остига олди. Бу ҳақда Associated Press хабар берди.

Давлат департаментининг маълум қилишича, ҳар қандай қонунбузарлик аниқланса, визалар бекор қилинади, агар шахс АҚШда бўлса, у депортация қилинади.
“Текширув давомида барча мавжуд маълумотлар, жумладан, ҳуқуқни муҳофаза қилиш ва иммиграция ёзувлари ҳам кўриб чиқилади”, дейилади департмент баёнотида.
Дональд Трамп ўзининг иккинчи президентлик муддатида мамлакатдаги ноқонуний мигрантлар ва вақтинчалик визага эга шахсларни депортация қилишга алоҳида эътибор қаратмоқда. Давлат департаментининг таъкидлашича, Трампнинг инаугурация кунидан бери визалар бекор қилиниши 2024 йилга нисбатан икки баробар ошган, хусусан талабаларга виза бериш 4 баробар камайган.
Давлат котиби Марко Рубио тижорий юк машиналари (трак) ҳайдовчилари учун ишчи виза бериш зудлик билан тўхтатилишини маълум қилган.
“АҚШ йўлларида кўплаб хорижий ҳайдовчилар хавфсизликка таҳдид солаётганига гувоҳ бўляпмиз. Улар америкалик ҳайдовчиларнинг иш ўринларини олиб қўймоқда”.
Миграция Сиёсати институти мутахассиси Жулиа Гелат эса бу текширувларнинг самарадорлигига шубҳа билдириб, шундай деди:
“Ушбу 55 миллион рақам сайёҳлик визасига эга одамларни ҳам ўз ичига олади”.
Янги қоидалар доирасида барча виза эгалари, шу жумладан уларнинг ижтимоий тармоқлари ва ҳужжатлари диққат билан ўрганилади.
“Бизнинг мақсадимиз — АҚШ миллий ва жамоат хавфсизлигини ҳимоя қилиш”, дейилади давлат департаменти баёнотида.
Одатда АҚШга келмоқчи бўлган хорижликларнинг аксариятидан, айниқса узоқ муддат ўқиш ёки ишлашни мақсад қилганлардан виза олиш сўралади. Қисқа муддатли сайёҳлик ёки бизнес ташрифлари учун 40 та Европа ва Осиё мамлакатлари фуқароларидан виза талаб қилинмайди. Улар тегишли ҳужжат олмасдан Қўшма Штатларда 3 ойгача қолиши мумкин. Айни пайтда, дунё мамлакатларининг аксарияти, жумладан, Хитой, Ҳиндистон, Индонезия, Россия ва Африка каби давлатлардан келадиган шахслар АҚШга саёҳат қилиш учун виза олишлари ва ариза топширишлари керак.
Ҳафта бошида АҚШ Давлат департаменти маҳаллий, штат ва федерал қонунларни бузганлик учун 6 мингдан ортиқ талабалар визасини бекор қилганини маълум қилганди. Уларнинг аксарияти зўравонлик, маст ҳолда ёки гиёҳванд моддалар таъсирида машина ҳайдаш ва терроризмни қўллаб-қувватлашда айбланган.
Изоҳ (0)