Оғир ўтган болалик, Бибернинг хиёнати, буйрак кўчириб ўтказиш ва паранойя: Селена Гомеснинг машаққатли ҳаёт йўли ҳақида

22 июль куни энг зиддиятли, ғамгин ва кўп муҳокама қилинадиган поп юлдузларидан бири Селена Гомес 33 ёшни қаршилади. Унинг мухлислари ва ижтимоий тармоқлардаги издошлари, шубҳасиз, ҳамкасблари орасида хонандага ҳавас қиладиганлар кўп. Бироқ шахсий бахт ва ижодий уйғунликка эришишдан олдин Селена қанчалик машаққатли йўлни босиб ўтганини кўпчилик билмайди.

Болалик ва Disney

Бритни Спирс, Кристина Агилера, Ариана Гранде, Майли Сайрус, Сабрина Карпентер, Оливия Родриго — улар муваффақиятлари учун Disney (ёки Nickelodeon)дан қарздор, чунки биринчи расмий қўшиқлари чиқишидан аввал ҳам кўпчилик уларни танирди.

Селена Гомес ҳам бундан мустасно эмас. Бироқ, унинг Disney’даги фаолияти жуда паст нуқтадан бошланган. Селена 1992 йилда Техасда, ота-онаси атиги 16 ёшда бўлганида туғилган. Табиий, мактаб ўқувчилари бўлган бу жуфтлик фарзанд кўришга на руҳий, на моддий жиҳатдан тайёр эди. Селена 5 ёшга тўлганида ота-онаси ажрашади. Уни онаси, бувиси ва бобоси тарбиялади. Хонанданинг айтишича, оиланинг моддий аҳволи шунчалик оғир эдики, улар ҳамма нарса бир доллардан сотиладиган дўконлардан спагетти сотиб олишга мажбур бўлишган.

Селенанинг онаси Менди актриса бўлишни жуда хоҳларди. Кундузи у Starbucks’да қаҳва дамлар, кечқурун эса ҳаваскорлар театрида орзусини рўёбга чиқарар ва баъзан қизини ҳам спектаклларга олиб борарди.

Кейинчалик Гомеснинг эслашича, онаси саҳна либосларини ўзи тикар ва “1990 йиллардаги Дрю Бeрриморга ўхшарди: сочи калта ва капалак шаклидаги соч безаклари бор эди”.

Қизча ҳам актриса бўлишни истарди — фақат театрда эмас, телевидениеда. Болалар боғчасига бориш ўрнига у доимий равишда кастингларда қатнашарди ва тўққиз ёшида унга биринчи бор омад кулиб боқади. Селенани “Барни ва дўстлари” болалар телесериали режиссёрлари суратга тушишга таклиф қилишади. Бироқ қизча актёрлар таркибида узоқ вақт қололмайди — 13 та қисмдан сўнг продюсерлар уни ишдан бўшатишади, чунки юмшоқ ўйинчоқ тираннозавр ҳақидаги шоу учун уни “жуда катта” деб ҳисоблайдилар.

Селенанинг ҳаётида чинакам бурилиш 15 ёшида содир бўлади: унга “Вейверли Плейс сеҳргарлари” сериалида бош рол таклиф этилади. У сеҳрли қобилиятларга эга ўсмир қиз Алекс Руссо ролини ижро этади. Сериал катта муваффақиятга эришиб, Селенани Disney Channel юлдузи ва ўсмирларнинг севимли қаҳрамонига айлантиради. У 2007 йилдан 2012 йилгача ушбу сериалда ва унинг асосида суратга олинган тўлиқ метражли фильмларда рол ўйнайди.

Шу билан бирга, Селена Disney’нинг бошқа лойиҳаларига ҳам таклиф қилинади. Жумладан, у Майли Сайрусни дунёга танитган “Ханна Монтана” ва “Зак ва Кодининг саргузаштлари” каби сериалларда қатнашади. “Маликани ҳимоя қилиш дастури” фильмида эса Селена ўша пайтда яқин дўстига айланган Деми Ловато билан ҳамкорликда суратга тушади.

Мусиқий карьерасининг бошланиши

2008 йилда Селена Гомес Деми Ловато ва Майли Сайрус каби юлдузлар сафига қўшилиб, янги қўшиқчи учун Тhе Scеnе гуруҳини тузган Hollywood Records студияси билан шартнома имзолайди. Бу жамоани тўлақонли гуруҳ деб аташ қийин эди — у кўпроқ ёш поп юлдузига жўр бўлувчи профессионал мусиқачилар жамоасига ўхшарди.

Selena Gomes & Тhе Scеnе 2008 йилдан 2012 йилгача фаолият юритиб, шу давр мобайнида учта альбом ёзди. Бу даврга оид бир қўшиқни албатта эшитгансиз: Love You Like a Love Song Селенани ўзбек тингловчиларига ҳам танитди.

Ўша пайтга келиб, Гомес расман якка ижрочи сифатида фаолият бошлайди. Тез орада у Stars Dance номли дебют альбомини чиқаради.

Кейинчалик Селенанинг ҳаётида яна бир муҳим бурилиш содир бўлади. 2015 йилда чиқарилган Revival номли альбом Disney поп маликасини бутунлай янги қиррасини намоён этади.

Жастин Бибер

У Жастин Бибер билан 2010 йилда учраша бошлаган. Ўша пайтда Селена ва Жастин беғубор ва соф ўсмирлик севгиси тимсоли эди.

Аммо Жастин ҳам, Селена ҳам шоу-бизнеснинг шафқатсиз чархпалаги домига тушиб қолишди: 24/7 папарацсиларнинг эътибори, ижтимоий тармоқларнинг кучайиб бораётган таъсири, заҳарли мухлислар гуруҳлари, ҳейтерлар ва тўхтовсиз босим.

Олти йиллик узилишлар билан давом этган руҳий зўравонлик, Жастиннинг хиёнати ҳақидаги миш-мишлар тинмасди. Иккала томон ҳам етарлича етук эмасди ва муносабат қуришни эндигина ўрганаётган эди.

Бибер ва Гомеснинг муносабатлари 2018 йилгача давом этди. Бу даврда жуфтликнинг самимий суратлари таблоидларнинг уларнинг муносабатларида муаммолар борлиги ҳақидаги ташвишли сарлавҳалари билан ёнма-ён чиқиб турарди. Айниқса, 2017 йилда шундай ажралишлардан бирида Селена Тhе Weekend билан қисқа муддатли муносабатда бўлди, ундан сўнг Жастин билан яна ярашди.

Бироқ 2018 йил март ойида улар узил-кесил ажрашди. Кўп ўтмай, Жастин Хейли Болдуин билан учраша бошлади ва 2018 йил сентябрда унга уйланди. Бу Селена учун оғир зарба бўлди.

2018 йилдаги ажралиш ва Жастиннинг Хейли билан никоҳидан сўнг, мухлислар ва оммавий ахборот воситалари Селенани тез-тез Хейли билан таққослашди, бу эса унинг ўзига бўлган ишончини пасайтирди. Селена доимо ўзи ҳақидаги салбий фикрларни ўқирди, унинг ўзига бўлган ҳурматини кўз ўнгида йўқолаётганини ҳис қиларди. 2019 йилда у ҳатто ижтимоий тармоқларда мухлисларини меҳрибонроқ бўлишга чақирди, шундан сўнг вақтинча ахборот маконидан ғойиб бўлди.

Касаллик

Селена ва Жастин Бибер ўртасидаги мураккаб муносабатлар қўшиқчининг жисмоний ва руҳий саломатлигига таъсир кўрсатди. Унинг кайфиятидаги тушунтириб бўлмайдиган ўзгаришлар ҳафталаб ёки ойлаб давом этарди. У уйқусизликдан азият чекарди. Ҳис-туйғуларнинг кўтарилиши пайтида Селена барча дўстларига машина сотиб олишни истарди, тушкунлик пайтида эса ўрнидан туролмай қолар ва ҳеч ким билан гаплашишни хоҳламасди.

“Дўстларим мени яхши кўрганлари учун овқат олиб келишарди, лекин ҳеч биримиз бу нима эканлигини тушунмасдик, — деб эслайди хонанда. — Баъзан ҳафталаб тўшакда ётардим ва ҳатто зинадан тушиш ҳам нафасимни қисарди. Мен йўқ бўлсам, дунё яхшироқ бўлади, деб ўйлардим”, дейди у.

Руҳий муаммолар фонида жисмоний муаммолар ҳам пайдо бўлди. 2015 йилда Селенага тизимли қизил волчанка ташхиси қўйилди. Бу иммунитет тизими организм ҳужайраларига ҳужум қиладиган касаллик. Натижада хонандада турли аломатлар, жумладан, ҳолсизлик ва бўғимларда оғриқ пайдо бўлди. Аммо энг даҳшатлиси, 2017 йилда Селенанинг иккала буйраги ҳам ишдан чиқди. Унинг яқин дугонаси трансплантация учун ўз буйрагидан воз кечди. Операция оғир кечди, шифокорлар олти соат давомида Гомеснинг ҳаётини сақлаб қолиш учун курашди.

Бироқ ҳаммаси шу билан тугамаган эди. 2018 йилда Селена турли овозларни эшита бошлади ва психоз хуружларига дуч келди. Шундан сўнг у тўртта реабилитация марказида даволанишига тўғри келди. Қўшиқчининг ўзи ўша даврдан фақат узуқ-юлуқ хотираларни эслайди, аммо дўстларининг айтишича, уни таниб бўлмасди: Гомес паранойя ва таъқиб қилиниш васвасасидан азият чекарди.

Ўшанда Селенага яна бир ташхис қўйилади — биполяр бузилиш. У бу ҳақда 2020 йилда Майли Сайрус подкастида очиқ гапирди. Қўшиқчи психозларга қарши дори-дармонлар ёрдамида курашишга мажбур бўлди.

2019 йилда касалхонадан чиққач, Гомес бир психиатрни топди. У Селена қабул қилиши керак бўлмаган жуда кўп дори ичаётганини тушунди ва иккита препаратдан ташқари барчасини бекор қилди. Аста-секин Селена ўзига кела бошлади.

Тузалиш ва Бланко билан ҳамкорлик

Соғлиқ ва шахсий ҳаётидаги муаммолар Селена Гомеснинг ижоди ва карьерасини тўрт йилга сезиларли даражада секинлаштирди. Бу 2010 йилларнинг иккинчи ярми эди, ўшанда поп мусиқа жуда катта ўзгаришларга учради. Ҳип-ҳоп, стриминг хизматлари, ижтимоий тармоқлар ва ёшлар орасида ташвиш ҳамда депрессиянинг кучайиши таъсирида оммабоп мусиқа секинроқ, очиқроқ ва қайғулироқ тус олди.

Селенанинг бу мавзуда айтадиган гаплари бор эди. У 2020 йилда шунчаки шахсий эмас, балки қалб азобига тўла Rare номли альбом билан қайтди. Селена Гомес ўзининг энг ғамгин қиёфасини намоён этди, унинг тимсоли Lose You to Love Me қўшиғи бўлди. Бу қўшиқ синган юрак, оғриқ ва бошдан кечирган барча нарсалар билан муроса қилиш ҳақида эди. Унда Селена муносабатларда ўзлигини йўқотгани ва бундай хатони бошқа такрорламасликка сўз бергани ҳақида сўзлайди. Оқибатда, Lose You to Love Me Billboard жадвалида биринчи ўринни эгаллаган Гомеснинг илк хити бўлди. Яна бир эътиборга лойиқ қўшиқ — Look at Her Now ҳам унинг соғайиши ва ўзини қабул қилиши тимсоли бўлиб қолди.

2023 йилда хонанданинг шахсий ҳаёти ҳам ниҳоят изга тушди — у Бенни Бланкога кўнгил қўйди. Оммавий аудитория уни яхши билмаслиги мумкин, бироқ унинг меҳнати натижасини ҳамма аниқ эшитган, чунки у Селена Гомес, Маroon 5 ва Жастин Биберга қўшиқлар ёзган.

Ҳозирда Бланко ва Бибер ижтимоий тармоқларда бир-бирларини кузатишмайди ҳам. 2024 йил охирида Бенни Селенага турмуш қуришни таклиф этди ва у розилик берди. Бироқ тўй қилиб саёҳатга чиқиш ўрнига жуфтлик I Said I Love You First номли альбом ёзишди. Техник жиҳатдан бу Селенанинг Бенни мусиқий раҳбарлигидаги альбоми бўлса-да, сарлавҳадаги иккала фамилия Селена ва Бенни ўртасидаги муҳаббатни ифодаловчи рамзий ишорадир.