Олий Мажлис Қонунчилик палатасининг 11 февралдаги ялпи мажлисида диний соҳадаги давлат сиёсати концепцияси ва уни тасдиқлаш ҳақидаги қонун лойиҳаси қабул қилиниб, Сенатга юборилди.
“Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепциясини тасдиқлаш тўғрисида”ги қонун лойиҳаси ва у билан тасдиқланаётган концепция лойиҳаси 31 январь куни қуйи палата мажлисида биринчи ўқишда қабул қилиниб, 10 февралгача жамоатчилик муҳокамаси учун жойлаштирилган эди.
Мажлисда маълум қилинишича, жамоатчилик муҳокамаси жараёнида аҳолидан 400 тадан ортиқ изоҳлар, таклиф ва тавсиялар келиб тушди. Шунингдек, 3 февраль куни Қонунчилик палатасида ОАВ вакиллари учун матбуот анжумани ўтказилиб, ташаббускор депутатлар томонидан журналистларнинг лойиҳага оид саволларига жавоблар берилди. 6 февраль куни эса Қонунчилик палатасида 16 та конфессия вакиллари билан концепция лойиҳасининг муҳокамасига бағишланган учрашув бўлиб ўтди.
Учрашувда барча конфессиялар вакиллари концепция лойиҳасини қўллаб-қувватлаб, унинг қабул қилиниши Ўзбекистонда динлар ва конфессиялараро тотувликни таъминлашга, тинчлик ва барқарорликни янада мустаҳкамлашга хизмат қилишини қайд этди.
“Келиб тушган изоҳлар, таклиф ва тавсиялар таҳлили шуни кўрсатмоқдаки, аксарият фуқароларимиз мазкур концепция ўз вақтида ишлаб чиқилгани ҳамда уни қабул қилиш юртимиз тараққиёти учун хизмат қилишини алоҳида эътироф этиб, уни қўллаб-қувватлашмоқда.
Келиб тушган изоҳ, таклиф ва тавсиялар атрофлича ўрганиб чиқилди. Ушбу таклифларнинг муҳокамаси ҳамда концепция лойиҳасини маромига етказишга бағишлаб ишчи гуруҳ ва масъул қўмитанинг йиғилишлари ўтказилди”, дейилади қуйи палата хабарида.
Таъкидланишича, муҳокамалар давомида сиёсий партиялар фракциялари раҳбарлари сўзга чиқиб, концепция мамалакат давлатчилиги ривожининг бой миллий-тарихий тажрибасига ва умуминсоний қадриятларга таянган ҳолда ишлаб чиқилгани ҳамда кўпмиллатли ва кўпконфессияли Ўзбекистонда умумжамият манфаатларини рўёбга чиқариш, демократия, дунёвийлик, эркинлик, тенглик, ижтимоий адолат ва бирдамлик асосида ўзаро тотувликда яшаш ҳамда изчил тараққий этиш учун зарур барқарор муҳитни таъминлашга қаратилганини қайд этди.
Изоҳ (0)