Россияда интернет ёки оммавий ахборот воситаларида ҳокимият вакилини ошкора ҳақорат қилганлар икки йилгача озодликдан маҳрум этилиши мумкин. Бу ҳақда “РБК” хабар берди.
РФ Жиноят кодексининг 319-моддасига ўз хизмат вазифаларини бажариш пайтида ёки у билан боғлиқ ҳолда ҳокимият вакилини ошкора ҳақорат қилганлик учун жавобгарликни кўзда тутувчи ўзгартиришлар киритиш таклиф этилмоқда. Уни Давлат думасининг Хавфсизлик ва коррупцияга қарши кураш қўмитаси раиси Василий Пискарев тайёрлаган.
Ҳозирча бу жиноят учун 40 минг рублгача жарима, 360 соатгача мажбурий меҳнат ёки 1 йилгача ахлоқ тузатиш ишлари белгиланган. Жарима миқдорини 80 минг рублгача 2 баравар кўпайтиришмоқчи, мажбурий меҳнатнинг максимал муддатини эса 460 соатгача, ахлоқ тузатиш ишлари муддатини эса 2 йилгача оширишмоқчи.
Қонун лойиҳасига кўра, интернет тармоғида ёки оммавий ахборот воситаларида содир этилган худди шундай жиноятлар учун жазо тайинлаш ҳақидаги моддага янги норма киритилади. Бу вазиятда айбдор 3 йилгача муайян лавозимларни эгаллаш ҳуқуқидан маҳрум этилган ҳолда 1 миллион рублгача жаримага тортилади.
Шунингдек, улар 480 соатгача мажбурий жамоат ишларига, икки йилгача мажбурий меҳнатга юборилиши мумкин. Максимал жазо сифатида 2 йилгача озодликдан чеклаш таклиф этилмоқда.
Изоҳ (0)