“Универсал аскар” (1992), “Қочишга жой йўқ” (1993), “Қалтис нишон” (1993) каби фильмлар юлдузи, 63 ёшли таниқли америкалик актёр Жан-Клод Ван Дамм орадан 36 йил ўтиб, ўз даврида машҳур бўлган суратини қайта гавдалантирди, деб ёзади “Nur.kz” нашри.
Актёр Instagram тармоғидаги саҳифасида 36 йиллик фарққа эга суратни жойлаштирди ва постда қуйидагича изоҳ қолдирди:
“27 ёки 63 — неча ёш бўлишингиздан қатъи назар, иш ҳеч қачон тўхтамайди. Айниқса, жанг санъати оламида яшайдиган инсонлар учун ёш кўрсаткичи бу шунчаки рақамдир. Қатъий интизом, диққатни жамлаш ва жасорат ила тарихни биргаликда яратишда давом этайлик”, деб ёзди жанг санъати устаси Ван Дамм.
Қисқа вақт ичида пост 170 мингдан ортиқ лайк йиғди. Мухлислар ушбу сурат остида ижобий изоҳларини қолдирди:
“Сиз ҳақиқий афсонасиз, бутун дунёга тақдим этган тарихда ўчмас образларингиз учун сизга раҳмат айтамиз”, “Менинг энг севимли актёрим, сиз ҳар доим энг зўр жангари фильмлар қаҳрамони бўлиб қоласиз”, “Менга доим илҳом бергансиз” дея мухлислар севимли актёрини эътироф этди.
Маълумот учун: ҳақиқий исми Жан-Клод Камил Франсуа Ван Варенберг бўлган Жан-Клод Ван Дамм 1960 йилда Бельгияда туғилган. 18 ёшида бўлажак актёр каратэ бўйича қора белбоғ олган ва бодибилдингда “Жаноб Бельгия” унвонини қўлга киритган. 1979 йилда Ван Дамм “Ит ва бўри орасидаги аёл” фильмида дебют қилган.
Жангари фильмлар юлдузи “Қалтис нишон” (1993) ва “Вақт патрули” (1994), “Репликант” (2001), “Жаҳаннамда” (2003), “Иккинчи қўмондон” (2006) ва бошқа кўплаб фильмларда иштирок этган.
Изоҳ (0)