Бухорода ихтисослаштирилган мактаб-интернати ўқитувчиси руҳий ногирон ўқувчини ургани айтилмоқда

Болалар омбудсмани котибиятига Бухоро шаҳрида яшовчи Э.Н. (эркак)нинг мурожаати келиб тушди. Бу ҳақда Болалар омбудсмани матбуот хизмати хабар берди.

Маълум қилинишича, Э.Н. ўз мурожаатида Бухоро шаҳридаги ихтисослаштирилган 27-сонли мактаб-интернатининг ўқитувчиси Ҳ.Н. (аёл) руҳий жиҳатдан ногирон бўлган 1-синф ўқувчиси О.К.га куч ишлатиб, унга руҳий босим ўтказганини, у ўқувчини қўлидан тортиб ерга судрагани ва урганини ҳамда синф хонасидаги қайчи билан таҳдид қилиб, унинг юз қисмига тираганини билдирган. 

Мурожаатда ҳолат юзасидан ҳуқуқни муҳофаза қилувчи органларга берган мурожаатининг кўриб чиқилиши натижаси юзасидан хабар берилмаганини билдириб, болага қилинган жисмоний ва руҳий зўравонлик ҳаракатлари учун Ҳ.Н.га нисбатан қонуний чора кўриш сўралган.

Таъкидланишича, болалар омбудсмани томонидан болага нисбатан бундай зўравонлик ҳолатини ҳар томонлама ўрганиш юзасидан ички ишлар ва прокуратура органлари ҳамда Мактабгача ва мактаб таълими вазирлигига сўров юборилган, ҳозирда ҳолат ўрганилмоқда.

Жумладан, ҳолат бўйича туман ИИБ томонидан терговга қадар текширув олиб борилмоқда.