Сирдарё вилояти Янгиер шаҳрида 13 ёшли қизнинг жасади ўз уйидан қотиллик аломатлари билан топилган эди. Вилоят ИИБ уни ўлдиришда гумонланган эркакка нисбатан қидирув эълон қилди.
Маълум қилинишича, Янгиер шаҳар “Обод юрт” маҳалласи Самарқанд кўчаси 8-уй, 7 хонадонда яшовчи, 1975 йилда туғилган Холтўраев Йўлдошали Ашурович оғир турдаги жиноят содир этганликда гумонланиб қидирилмоқда.
Алоҳида белгилари: бўйи 170-175 см атрофида, буғдойранг, озғиндан келган, эгнида сариқ-кўк чизиқли кўйлак, қора рангли шим ва оёғида қора рангли туфли бўлган.
Ушбу шахс ҳақида маълумотга эга бўлган фуқаролардан қуйидаги телефон рақамларига мурожаат қилиш сўралди:
102 қисқа рақами, (67) 343-52-22, (67) 343-51-11, (78) 221-02-73, (67) 350-11-02, (88) 908-22-00
Хабар берганларнинг шахсига оид маълумотлари сир сақланиши кафолатланади. Ушбу фуқаро топилишида кўмаклашган фуқаролар 10 миллион сўм пул маблағи билан мукофотланади.
Аввалроқ қизнинг онаси бу қотилликда ишқий муносабат билдириб юрган эркакдан гумон қилаётганини таъкидлаган эди. Айтишича, эркак оиласига бирор марта ёмон сўз гапирмаган, аёлга уни ёқтириб қолганини билдирган.
“Энг меҳрибон қизим ўша эди. Битта гумоним Йўлдош деган одамдан. У бизга ёмон гапирмасди. Шу сабабли унга ишониб шунақа аҳволга тушиб ўтирибмиз. У орқамдан роса юрар эди. Ичмасангиз, яхши одам бўлсангиз, майли дедим, розилик бергандим.
Ишдан келганимда эшигимда қулф сал осилиб турган эди. Ҳайрон қолдим-да, қизимни чақирдим, индамади. Қарасам ётган экан. Кейин билсак, аллақачон ўлган экан. Кийимлари йиртилмаган, бутун эди”, дейди аёл.
Танишувига бир ой бўлган эркак она ва қизларнинг ишончига кирган бўлган. Воқеа содир бўлган куни эркак марҳуманинг опаларига уйга кирмасликларини айтиб, чалғитган.
Қотилликда гумондор 9 кундан буён қидирилмоқда.
Изоҳ (0)