Непалда 12 июль куни юз берган автобус ҳалокати оқибатида 55 киши бедарак йўқолган. Бу ҳақда Al Arabiya нашри хабар берди.
Манбада айтилишича, йўловчиларни олиб кетаётган автобус кучли ёмғир ёғиши ва кўчки оқибатида йўлдан чиқиб кетиб, дарёга ағдарилган. Тўлиб оқаётган дарё эса автобусни оқизиб кетган.
Ҳалокатга учраган автобус ичида 65 нафар йўловчи бўлган. Тезкор қидирув жараёнида 10 кишининг жасади топилган.
Юзлаб хавфсизлик ходимлари ва қутқарувчилар иштирокида қидирув ишлари давом этаётгани хабар қилинган. Автобусда қолиб кетган 55 киши ҳалигача топилмаган.
Ҳалокат пойтахт Катмандудан 86 километр ғарбда жойлашган Читван туманида рўй берган. Ҳудудда кучли ёғингарчилик ва фавқулодда ҳолат юзага келгани боис қутқарув операцияларини тезда бошлаш имкони бўлмаган.
“Омон қолганларни топиш имконияти йўқ. Бизнинг диққатимиз фақат жасадларни топишга қаратилган”, — деган Читван туманидаги полиция идораси ходими Бҳеш Раж Рижал.
Непалда июнь ойи ўрталаридан бери давом этаётган кучли муссон ёмғирлари сабаб фавқулодда вазият эълон қилинган. Ҳозирга қадар кўчки ва тошқинлар оқибатида 100 дан ортиқ фуқаро ҳалок бўлгани хабар қилинган.
Кўчкидан сўнг ҳукумат ноқулай об-ҳаво прогнози бўлган ҳудудларда автобусларнинг тунги вақтда ҳаракатланишини тақиқлаш режасини эълон қилган.
Изоҳ (0)