Ўзбекистон футбол ассоциациясининг мақоми ва ўтиши бўйича қўмитаси ўтган йилнинг 25 декабрь санасида футбол клубларини профессионал футболчилар олдидаги шартномавий мажбуриятларини бажаришга чақириб, барча қарзларни 2024 йил 10 январгача қоплаш учун муддат белгилаган эди.
Бир қатор клублар бу мажбуриятларини бажарган ва қарзларни белгиланган муддатга қадар тўлаган бўлса-да, аксарият клублар тўлов муддатини узайтиришни сўраб мурожаат қилган ва бу мурожаатлар Ўзбекистон футболчилар уюшмаси томонидан қўллаб-қуватланган. “Нефтчи” ва “Навбаҳор” жамоалари қарзларни апрель охиригача бартараф этишлари белгиланган, аммо бугунги кунга келиб ҳам қарздорликни бартараф этмаган.
Бу эса регламентнинг 12-моддасига зид экани маълум. Ушбу моддага кўра, клуб футболчилар ва бошқа клублар олдидаги, шунингдек, профессионал футболчилар билан имзоланган шартномалар ва трансфер келишувларида кўрсатилган шартларга мувофиқ, ўз молиявий мажбуриятларига риоя қилиши лозим.
Бундан ташқари, “Сурхон” ФК бир неча бор Ўзбекистон футбол ассоциациясининг мақоми ва ўтиши бўйича қўмитаси қарорларини бажармаган. Бу ҳолат жиддий санкцияларга, жумладан, мусобақа жадвалида очколарни йўқотишга олиб келиши ҳақида кўп маротаба огоҳлантирилган.
Хабарда айтилишича, ФИФА нормалари ва қоидаларига мувофиқ, клублар футболчиларга шартномаларга кўра барча қарзларини тўлашлари шарт. Акс ҳолда, клублар жорий трансфер ойнасида янги футболчиларни рўйхатдан ўтказиш имкониятидан маҳрум бўлишлари мумкин.
ПФЛ ушбу уч клубга таъқиқ қўйилгани ҳақид хабар берди.
“Жорий йилнинг 16 июль санасига қадар Лига бу уч клубнинг янги футболчиларини рўйхатдан ўтказмайди. Мазкур санага қадар ҳам қўмита қарорлари ижроси бажарилмаса, 16 июль санасидан сўнг улар фақатгина 2002 ва ундан кейин туғилган футболчини рўйхатдан ўтказиши учун рухсат берилади. Бунда клублар “Суперлига ва Пролига регламенти”да белгиланган лимитдан чиқиб кетмаслиги таъминланади.
Агар трансфер ойнасининг сўнгги куни бўлган 30 июль санасига қадар ҳам мавжуд қарздорлик бартараф этилмаса, у ҳолда автоматик равишда 2025 йилнинг қишки трансфер ойнасида легионер футболчини рўйхатдан ўтказиш учун тақиқ кучга киради. Шундан сўнг мазкур клублардан 6 очкогача олиб ташлаш масаласи кун тартибига киритилади”, — дейилади ПФЛ баёнотида.
Изоҳ (0)