O‘zbekiston futbol assotsiatsiyasining maqomi va o‘tishi bo‘yicha qo‘mitasi o‘tgan yilning 25-dekabr sanasida futbol klublarini professional futbolchilar oldidagi shartnomaviy majburiyatlarini bajarishga chaqirib, barcha qarzlarni 2024-yil 10-yanvargacha qoplash uchun muddat belgilagan edi.
Bir qator klublar bu majburiyatlarini bajargan va qarzlarni belgilangan muddatga qadar to‘lagan bo‘lsa-da, aksariyat klublar to‘lov muddatini uzaytirishni so‘rab murojaat qilgan va bu murojaatlar O‘zbekiston futbolchilar uyushmasi tomonidan qo‘llab-quvatlangan. “Neftchi” va “Navbahor” jamoalari qarzlarni aprel oxirigacha bartaraf etishlari belgilangan, ammo bugungi kunga kelib ham qarzdorlikni bartaraf etmagan.
Bu esa reglamentning 12-moddasiga zid ekani ma’lum. Ushbu moddaga ko‘ra, klub futbolchilar va boshqa klublar oldidagi, shuningdek, professional futbolchilar bilan imzolangan shartnomalar va transfer kelishuvlarida ko‘rsatilgan shartlarga muvofiq, o‘z moliyaviy majburiyatlariga rioya qilishi lozim.
Bundan tashqari, “Surxon” FK bir necha bor O‘zbekiston futbol assotsiatsiyasining maqomi va o‘tishi bo‘yicha qo‘mitasi qarorlarini bajarmagan. Bu holat jiddiy sanksiyalarga, jumladan, musobaqa jadvalida ochkolarni yo‘qotishga olib kelishi haqida ko‘p marotaba ogohlantirilgan.
Xabarda aytilishicha, FIFA normalari va qoidalariga muvofiq, klublar futbolchilarga shartnomalarga ko‘ra barcha qarzlarini to‘lashlari shart. Aks holda, klublar joriy transfer oynasida yangi futbolchilarni ro‘yxatdan o‘tkazish imkoniyatidan mahrum bo‘lishlari mumkin.
PFL ushbu uch klubga ta’qiq qo‘yilgani haqid xabar berdi.
“Joriy yilning 16-iyul sanasiga qadar Liga bu uch klubning yangi futbolchilarini ro‘yxatdan o‘tkazmaydi. Mazkur sanaga qadar ham qo‘mita qarorlari ijrosi bajarilmasa, 16-iyul sanasidan so‘ng ular faqatgina 2002 va undan keyin tug‘ilgan futbolchini ro‘yxatdan o‘tkazishi uchun ruxsat beriladi. Bunda klublar “Superliga va Proliga reglamenti”da belgilangan limitdan chiqib ketmasligi ta’minlanadi.
Agar transfer oynasining so‘nggi kuni bo‘lgan 30-iyul sanasiga qadar ham mavjud qarzdorlik bartaraf etilmasa, u holda avtomatik ravishda 2025-yilning qishki transfer oynasida legioner futbolchini ro‘yxatdan o‘tkazish uchun taqiq kuchga kiradi. Shundan so‘ng mazkur klublardan 6 ochkogacha olib tashlash masalasi kun tartibiga kiritiladi”, — deyiladi PFL bayonotida.
Izoh (0)