Ҳиндистонда 9 июнь куни зиёратчиларни олиб кетаётган автобус жарликка қулади. Бу ҳақда Ҳиндистон маҳаллий нашрларига таяниб, Al Jazeera нашри хабар берди.
Ҳалокат Ҳиндистон шимолидаги Кашмирда юз берган. Автобус жарликка қулашидан олдин унга номаълум гуруҳ томонидан ўқ узилгани айтилган.
Полиция ҳалокат оқибатида 9 нафар фуқаро ҳалок бўлганини маълум қилган. Жароҳатланганлар сони эса 33 нафарга етган.
Ҳалокатга учраган автобус Кашмирдаги Реаси шаҳридан қайтаётган бўлган. Ушбу шаҳардаги Мата Ваишно Деви ибодатхонаси ҳиндлар учун муқаддас ҳисобланади.
“Жангарилар автобусга пистирма уюштириб, унга қарата ўқ узган. Автобус дарага қулаб тушган. Бунинг натижасида тўққиз нафар зиёратчи ҳалок бўлган, 33 нафари жароҳат олган”, — дея баёнот берган Реаси тумани полицияси бошлиғи Моҳита Шарма журналистларга.
Ҳозирда автобусдагиларни қутқариб олиш операцияси якунланган. Жароҳатланганлар Нараяна касалхонаси ва Реаси туман касалхонасига етказилган.
Мамлакат фуқароларининг бир қисми бу каби ҳужумлар содир бўлишида мамлакат бош вазирини айблаган. Нарендра Модининг мамлакат ичида тинчликка эришиш борасидаги “иши бўш” даъволари ва сайлов ваъдалари қуруқ гап бўлиб қолаётгани айтилган.
Ҳеч бир террорчи гуруҳ ҳозирча ҳужум учун жавобгарликни бўйнига олмаган. Полиция автобусга ўқ узганлар қидирилаётганини маълум қилган.
Изоҳ (0)