Xorazm viloyatida aliment qarzdorligi sabab 4 yildan ortiq vaqt mobaynida qidiruvda bo‘lgan shaxs ushlandi, deb xabar beradi O‘zA.
Qayd etilishicha, Majburiy ijro byurosi Taxiatosh tuman bo‘limi ish yurituvida bo‘lgan ish yuzasidan Fuqarolik ishlari bo‘yicha Urganch tumanlararo sudi buyrug‘iga asosan qarzdor K.A.dan bir nafar farzandi taʼminoti uchun sobiq turmush o‘rtog‘i foydasiga aliment undirish belgilangan.
Qarzdor aliment pullarini to‘lashdan qochib yurgani sababli unga nisbatan Majburiy ijro byurosi Taxiatosh tuman bo‘limi davlat ijrochisi tomonidan 2020-yil 12-mart kuni qidiruv eʼlon qilingan. Uning aliment to‘lovlaridan qarzdorligi 2024-yil 1-may holatiga ko‘ra, 101 million so‘mni tashkil etgan.
Byuroning Qoraqalpog‘iston Respublikasi boshqarmasi qidiruv sho‘basi xodimlari tomonidan olib borilgan tezkor-qidiruvda qarzdor K.A. Urganch tumanida ikkinchi oilasining uyida istiqomat qilayotgani aniqlangan. Byuroning Xorazm viloyati boshqarmasi qidiruv sho‘basi xodimlari bilan birgalikda amalga oshirilgan tezkor-qidiruv tadbirlarida 4 yildan ortiq vaqt mobaynida qidiruvda bo‘lgan qarzdor K.A. Urganch tumanida joylashgan tovuq fermasida ishlayotgan vaqtida topilgan.
Hozir qarzdorga nisbatan maʼmuriy bayonnoma rasmiylashtirilib, to‘plangan hujjatlar Jinoyat ishlari bo‘yicha Taxiatosh tuman sudiga yuborilgan va ushbu sud tomonidan 6-may kuni qarzdor K.A.ga nisbatan 15 sutka maʼmuriy qamoq jazosi qo‘llanilgan.
Bundan oldin Namangan viloyati Chortoq tumanida aliment to‘lashdan qochib yurgan erkak uy yerto‘lasidan topilgandi. Shuningdek, Farg‘onada aliment to‘lamay yurgan erkak boshqa xotinining uyidan mast holda topilgani to‘g‘risida xabar berilgandi.
Izoh (0)