Самарқандда вилоятида жорий йилнинг 1 январь ҳолатига кўра фаолият кўрсатаётган тадбиркорлик субъектларининг сони 2023 йилга нисбатан 10,5 мингтага камайган. Бу ҳақда Сенат ишчи гуруҳининг Самарқанд вилоятида ўтказилган ўрганишлари юзасидан берган ахборотида маълум қилинди.
Ўрганиш жараёнларида ҳоким ёрдамчилари томонидан мурожаатларни кўриб чиқишда белгиланган муддатлар бузилгани ва аниқланган бўш ер майдонларини аукцион савдоларига чиқариш ишлари самарасиз ташкил этилгани аниқланган.
Назорат қилувчи органлар томонидан тадбиркорлик фаолиятига асоссиз аралашув ва эркин рақобат муҳитини бузиш ҳолатларига йўл қўйилган.
Жумладан, вилоятдаги назорат органлари томонидан ўтказилган текширишларда 2 минг 266 та қонун бузилиши ҳолати аниқланган, шундан 4 тасида ноқонуний текшириш ва 2 минг 262 тасида текшириш ўтказиш тартибини бузиш ҳолатларига йўл қўйилган. Уларнинг 55 фоизи Транспорт бошқармаси ва 33 фоизи Ўсимликлар карантини инспекцияси ходимлари томонидан содир этилган.
3 минг 497 та тадбиркорлик субъекти иқтисодий қийинчиликлар сабабли ўз фаолиятини тўхтатган, — дейилади Сенат ахборотида.
“Тадбиркор виртуал офиси” ахборот портали орқали келиб тушган мурожаатларни кўриб чиқиш тартиби ва муддати устидан назорат ўрнатилган бўлишига қарамай, мурожаатларнинг 205 таси бўйича кўриб чиқиш муддати бузилган. Жумладан:
- Самарқанд шаҳри,
- Паст Дарғом,
- Ургут,
- Иштихон,
- Нарпай,
- Пайариқ,
- Булунғур туманларида тадбиркорларнинг мурожаатлари кўриб чиқилишида қонун бузилишга йўл қўйилган.
Сенат ишчи гуруҳи томонидан вилоятда тадбиркорликни ривожлантириш ва сармояларни жалб қилиш йўналишида мавжуд муаммо ва камчиликларни бартараф этиш юзасидан тегишли таклиф ва тавсиялар ишлаб чиқилиб, уларни бартараф этиш бўйича мутасаддиларга кўрсатмалар берилган.
Изоҳ (0)