Damashqdagi Eron konsulligiga Isroil havo hujumi mintaqada keng ko‘lamli urushga olib keladigan “so‘nggi tomchi” bo‘lishi mumkin, deb yozadi CNN nashri.
CNN’ga ko‘ra, ko‘plab davlatlar mintaqada o‘t ochishni to‘xtatishga harakat qilgan va keng ko‘lamli urushning oldini olish uchun bor kuchini sarflagan. Biroq Isroilning zarbasi mintaqada jangovar harakatlar avj olishi ehtimolini keskin oshirishi mumkin.
Avvalroq Eronning BMTdagi vakolatxonasi Tehron xalqaro huquq doirasida Isroilning Damashqdagi Eron konsulligiga havo hujumiga javob berish qonuniy huquqini o‘zida saqlab qolishi haqida ma’lum qildi.
1-aprel kuni SANA agentligi Isroil havo kuchlari Damashqdagi uyga zarba bergani haqida xabar berdi. Keyinroq Eron matbuoti Suriya poytaxti g‘arbidagi Mezze xiyobonida joylashgan Eron konsulligi binosi o‘qqa tutilganini ma’lum qildi. Eronning Suriyadagi elchisi Husayn Akbariyning so‘zlariga ko‘ra, hujum oqibatida 5-7 kishi halok bo‘lgan. O‘z navbatida, Islom inqilobi qo‘riqchilari korpusi yetti nafar harbiy maslahatchi, jumladan, generallar Muhammad Rizo Zohidiy va Muhammad Hodi Hoji Rahimiy hamda besh nafar zobit halok bo‘lgani haqida aytgan.
Suriya tashqi ishlar vaziri Faysal Miqdod Eron diplomatik missiyasiga tashrif buyurib, Isroilning mazkur hujumini qoralagan. Eron TIV matbuot kotibi Nosir Kanoniyning taʼkidlashicha, Tehron “tajovuzkorni qanday jazolash”ni hal qiladi. Qatar, BAA, Ummon va Pokiston ham Eron konsulligiga hujumni qoralagan. Rossiya TIV Isroilning xatti-harakatlari mutlaqo qabul qilib bo‘lmaydigan va to‘xtatilishi kerakligini aytgan.
Isroil armiyasi vakili brifingda Isroil harbiylarining Damashqqa zarba bergani haqidagi ma’lumotga izoh berishdan bosh tortgan.
Izoh (0)