Ўзбекистонда айрим педагоглар касбий сертификатлаш синовларидан ўтказилади, деб хабар бермоқда Мактабгача ва мактаб таълими вазирлиги.
Келтирилишича, Вазирлар Маҳкамасининг 2024 йил 12 февралдаги 87-сон қарори билан давлат умумий ўрта таълим ташкилотлари педагог кадрларини касбий сертификатлаш бўйича давлат хизматларини кўрсатишнинг маъмурий регламенти тасдиқланди. Унга кўра:
- 2023/2024-ўқув йилидан бошлаб умумий ўрта таълим ташкилотларида педагог касбига биринчи марта ишга қабул қилинган стажёр-ўқитувчилар;
- 2024/2025-ўқув йилидан бошлаб эса босқичма-босқич умумий ўрта таълим ташкилотларининг тегишли тоифага эга бўлмаган педагог кадрлари касбий сертификатлаш синовларига жалб этилади.
Педагоглар мазкур давлат хизматидан фойдаланиш учун 2024 йил 1 мартдан бошлаб давлат хизматлари марказлари ёки Ягона интерактив давлат хизматлари портали орқали мурожаат қилади. Юқорида келтириб ўтилган регламентга кўра:
- педагогик касбга биринчи марта ишга қабул қилинадиган олий маълумотли талабгорлар стажёр-ўқитувчи сифатида фаолият юритади ва улар ишга қабул қилинган вақтдан бошлаб бир йил муддат давомида касбий сертификатга эга бўлиши талаб этилади;
- касбий сертификат олганидан сўнг педагоглар педагогик фаолиятида беш ва ундан кўп йил давомида узилишлар бўлган фаолиятини қайта бошлаган вақтдан бошлаб бир йил давомида касбий сертификатга эга бўлиши лозим;
- касбий сертификат олиш учун назорат синови қоида тариқасида, ҳар йили март–май ойларида тест шаклида ўтказилади;
- назорат синови натижаси бўйича 56 ва ундан юқори балл тўплаган талабгор назорат синовидан ўтган ҳисобланади ва электрон шаклдаги сертификат унинг шахсий кабинетига юборилади.
Изоҳ (0)