Тошкент вилоятида туманлар экспортбоп экин етиштиришга ихтисослаштирилади, деб хабар бермоқда вилоят ҳокимлиги ахборот хизмати.
Унга кўра, Тошкент вилоятида туманларни экспортбоп ва сердаромад экинлар экишга, шунингдек, кичик ишлаб чиқариш ва маҳсулот етиштиришга ихтисослаштирилади. Бу ҳақда Тошкент вилояти ҳокими Зойир Мирзаев тегишли қарорни имзолади.
Жорий йилда Бўка, Янгийўл, Юқори Чирчиқ ва Зангиота туманлари экспортбоп экинлар етиштиришга ихтисослаштирилади ҳамда мазкур туманларга 10 нафардан экспортёрлар бириктирилади.
2024 йил якунига қадар мева-сабзавотчиликка ихтисослашган туманларда мева-сабзавотларни шок усулида музлатишни йўлга қўйиш бўйича янги лойиҳалар амалга оширилади. Шунингдек, барча шаҳар ва туманларда аҳоли томорқа ер майдонларида баҳорги, такрорий ва тўқсонбости усулида экинлар экиш орқали 3 маротаба ҳосил олишни назарда тутувчи қишлоқ хўжалиги экинларини жойлаштириш прогноз кўрсаткичлари ҳам ишлаб чиқилган.
Бундан ташқари, кичик бизнесни узлуксиз қўллаб-қувватлаш комплекс дастури доирасида ишлаб чиқаришга оид лойиҳалар билан бир қаторда маҳсулот етиштириш билан боғлиқ лойиҳаларга (қишлоқ хўжалиги экинларини етиштириш бундан мустасно) 100 миллион сўмгача гаровсиз кредитлар ажратилади. Музлаткичли омборхона, тайёр ҳолда иссиқхона, қадоқлаш, қуритиш ва қайта ишлаш цехлари аҳолига 12 ойга бўлиб тўлаш шарти билан лизингга берилиши белгиланди.
Изоҳ (0)