Ўзбекистонда бугун, 13 мартдан “Ташаббусли бюджет”га овоз бериш жараёни бошланиши белгиланган. Бу ҳақда Иқтисодиёт ва молия вазирлиги хабар берганди. Айни пайтда овоз бериш учун зарур платформа – “Open budjet” порталида техник носозлик кузатилмоқда.
Иқтисодиёт ва молия вазирлигининг “Дарё”га маълум қилишича, мутахассислар “Очиқ бюджет” порталида кузатилаётган техник муаммони бартараф этиш устида ишламоқда.
Маълумот учун, “Ташаббусли бюджет”га овоз бериш муддати 13 мартдан 1 апрель, соат 23:59 га қадар давом этади. Фуқаролар “Очиқ бюджет” портали орқали ёки порталнинг мобил иловасида танлаган лойиҳаларига овоз беришлари мумкин.
Жорий мавсумда фуқаролар томонидан илгари сурилган лойиҳаларни амалга ошириш учун 3 триллион сўм ажратилиши белгиланган. Бу ҳудудларда инфратузилма, ижтимоий хизматлар, экология ва маданиятни яхшилашга ёрдам берадиган жуда катта маблағ экани маълум қилинган.
Маълумотларга кўра, ҳозиргача порталга 9 443 та маҳалла фуқаролар йиғинидан 35 575 та ташаббус келиб тушган бўлиб, шундан 28 919 таси маъқулланган. Жорий мавсумдан бошлаб овоз бериш жараёнида “Бир фуқаро, бир овоз” тамойили ишлайди.
Изоҳ (0)