“Muhabbat qahvasi” efirga uzatilganiga 30 yil to‘ldi: Serialning bosh qahramonlari hozir qanday ko‘rinishda? (foto)

Lotin Amerikasida suratga olingan eng muvaffaqiyatli seriallardan biri “Muhabbat qahvasi” “Yoshlar” telekanalida 15-fevraldan boshlab efirga qaytmoqda. Ilk marta efirga uzatilganiga 30 yil to‘lgan serial sabab mashhurlik cho‘qqisiga chiqqan aktyorlar bilan birga o‘sha davrlarni yodga olamiz.

Serial sujeti

Bepoyon qahva dalasi. Bir guruh ishchilar qahva terish bilan band. Ular orasida yoqimli ovozga ega jingalak soch Gaviota ham qo‘shiq kuylab qahva termoqda. Oddiy qahva emas, muhabbat qahvalarini.

Badavlat fermer Oktavioning dafn marosimiga tashrif buyurganlar ichida uning nabirasi Sebastyan ham bor. U qahva teruvchi qizga oshiq bo‘lgan. Londonga o‘qish uchun ketgan Sebastyan va uni izlab ortidan begona yurtlarga borgan Gaviotani oldinda bir qancha sinovlar kutib turar edi. Juftlik bir-biriga nisbatan har qancha nafrat va alamzadalik kayfiyatida bo‘lmasin, “Muhabbat qahvasi” ularni yana bir joyda uchrashtiraveradi.

“Muhabbat qahvasi” seriali ssenariysi marhum yozuvchi Fernando Gaytanga tegishli bo‘lib, 1994-yilda ekran yuzini ko‘rdi va qahva teruvchi Gaviota ismli qiz hamda mashhur qahvachilar oilasining vakili Sebastyanning muhabbati millionlab tomoshabinlar e’tiborini tortdi.

Kolumbiyaning Bagota shahrida joylashgan qahva dalalari va shahar manzaralari orasida kechgan muhabbat hikoyasi qahva madaniyatini butun dunyoga mashhur qilgan eng birinchi serial namunasiga aylandi. Filmi muvaffaqiyatga erishgan Gaytan 58 yoshida yurak xastaligi tufayli vafot etdi.

Bosh qahramon Gaviota (Margarita Rosa de Fransisko) 28 yosh, Sebastyan esa (Gay Ekker) 25 yoshda edi. Film shuhrat qozonish bilan birga bir necha tanlovlarda ham g‘olib bo‘ldi.

Margarita Rosa de Fransisko

Aktrisa 1965-yil 8-avgustda Kolumbiyaning Kali shahrida tug‘ilgan. U musiqachi va aktyor Xerardo de Fransisko hamda modelyer Mersedes Bakoroning qizi edi. Uning opasi Martina de Fransisko ham teleboshlovchi bo‘lgan.

Margarita bolaligida Kali shahridagi Antonio Mariya konservatoriyasi balet yo‘nalishi bo‘yicha ta’lim oladi va umurtqa pog‘onasidagi kasallik tufayli bu sohani tark etishga majbur bo‘ladi. Keyinchalik ingliz tilini o‘rganish maqsadida Nyu-Yorkka ketadi va 1984-yil “Yil go‘zali” e’tirofiga sazovor bo‘ladi.

1984-yil Kolumbiyadagi “Milliy go‘zallik” tanlovida oliy o‘rin sovrindoriga aylanadi. Afsuski, 1985-yilda o‘tkazilgan “Dunyo go‘zali” tanlovida avvalgidek muvaffaqiyatga erisholmaydi.

1986-yilda rejissor Xulio Sezarning “Gallito Ramires” telenovellasida Karlos Vives bilan tanishadi va oradan ikki yil o‘tib, ular turmush quradi. Ammo aktrisaning nikohi muvaffaqiyatsizlikka uchraydi. 

Shu tarzda bir qancha muvaffaqiyatli rollar ijrosidan so‘ng, u 2003-yili 46 yoshida o‘zidan 8 yosh kichik, 38 yoshli Daniyel Kastelloga turmushga chiqqan.

Gay Federik Ekker

Serialda Sebastyan rolini ijro etgan aktyor Gay Federik Ekker 1959-yil Braziliyaning San-Paulu shahrida dunyoga kelgan. U ota-onasi AQSHdan Braziliyaga ta’tilga qaytgan paytda dunyoga keldi. Oilada uchinchi bo‘lib tug‘ilgan farzandning akalari va singillari ham bor.

Aktyor uch tilda – portugal, ispan va ingliz tillarida bemalol so‘zlasha oladi. U AQSH va Lotin Amerikasida suratga olingan ko‘plab filmlarda rol ijro etgan. Ijodi davomida hammasi bo‘lib 20 ga yaqin kino va telenovellalarda suratga tushgan.

Aktyor ham partnyori kabi ikki marotaba oila qurdi. Birinchi turmush o‘rtog‘i amerikalik aktrisa, xonanda, teleboshlovchi va prodyuser Nia Piplz edi.  

Ikkinchi turmush o‘rtog‘i Estela Sayns bilan u mustahkam oila qurib, ular ikki farzand ko‘rgan.