Ёмғир, қор, 15 даражагача совуқ: Ўзбекистонда ҳафта давомида қандай об-ҳаво бўлади?

“Ўзгидромет” ҳафта давомида кузатиладиган об-ҳаво ҳақида маълумот берди.

Унга кўра, 29 январь, душанба куни Ўзбекистон ҳудуди нам ва нисбатан совуқ ҳаво массалари таъсири остида бўлади, республика бўйича асосан ёмғир кўринишидаги ёғингарчилик кузатилади, тоғолди ва тоғли ҳудудларда ёғингарчилик кучли бўлиши мумкин. Баъзи жойларда шамол тезлиги 17-22 метр/секундгача кучаяди, айрим жойларда эса 25-28 метр/секундгача кучайиши мумкин. Кундузги ҳаво ҳарорати олдинги кунга нисбатан пасаяди ва 2-7 даража илиқдан юқори бўлмайди, республика шимолида 3-5 даража совуқ бўлади.

30 январь, сешанба куни республика ҳудудининг катта қисмида ёғингарчилик жадаллиги ва эҳтимоли камаяди. Кўпчилик вилоятларнинг баъзи жойларида қор кўринишидаги бир оз ёғингарчилик, шарқий ҳудудларда эса (Тошкент, Андижон, Наманган, Фарғона вилоятларида) асосан ёмғир кўринишидаги ёғингарчилик бўлиши мумкин. Фақат республиканинг жанубида шамол тезлиги 15-20 метр/секундгача кучайиши кутилмоқда. Ҳаво ҳарорати кечаси 0-5 даража совуқни, кундузи 2-7 даража илиқни, шимолда кечаси 8-13 даража совуқни, кундузи 0-5 даража совуқни ташкил этади.

31 январь—1 февралда республика ҳудудининг катта қисмида ёғингарчилик кутилмайди, фақат Тошкент вилоятининг айрим жойларида ва Фарғона водийси вилоятларида бир оз ёғингарчилик (ёмғир, қор) бўлиши мумкин. Ҳаво ҳарорати кечалари 0-5 даража совуқ, кундуз кунлари 0-5 даража илиқ, шимолда кечалари 10-15 даража совуқ, кундуз кунлари 3 даража совуқ-2 даража илиқ бўлади.

Ушбу иш ҳафтаси давомида республика бўйича баъзи жойларда туман кузатилади.

29 январдан 31 январгача Тошкент ва Наманган вилоятларининг тоғли ҳудудларида қор кўчиши хавфи бор.

Тошкентда 29 январь куни вақти-вақти билан ёмғир ёғади. Шамол ғарбдан 5-10 метр/секунд тезликда эсади. Ҳаво ҳарорати кундузи 5-7 даража илиқни ташкил этади. Сешанба ва чоршанба кунлари бир оз ёғингарчилик (ёмғир ёғади, қорга айланади) бўлиши мумкин. Кечаси ва эрталаб туман тушиши мумкин. Ғарбий шамол йўналишини ўзгартириб, шарқдан 5-10 метр/секунд тезликда эсади.

Ҳаво ҳарорати 30 январда кечаси 1-3 даража илиқ, кундузи 4-6 даража илиқ, 31 январда кечаси 0-2 даража совуқ, кундузи 3-5 даража илиқ бўлади.

1 февралда асосан ёғингарчиликсиз об-ҳаво бўлиши кутилмоқда. Кечаси ва эрталаб туман тушиши мумкин. Шамол шарқдан 3-8 метр/секунд тезликда эсади. Ҳаво ҳарорати кечаси 1-3 даража совуқни, кундузи 3-5 даража илиқни ташкил этади.