“Муҳаббат тафти” сериалидаги роли Санайя Эронийни бутун дунёга машҳур қилди. Барун Собти билан бўлган ишқий муносабатлардан тортиб, икки фарзандининг туғилиши ва автоҳалокатда вафот этганигача… Келинг, ушбу ажойиб актрисанинг таржимаи ҳолида нима ҳақиқат-у, нима ёлғон эканлигини билиб оламиз.
Санайя Эроний 1983 йил 17 сентябрда Мумбайда эронликлар оиласида туғилган ва Утининг сокин муҳитида улғайган — бу ерда етти йил мактаб-интернатда ўқиган. Ути Тамилнаду штатидаги курорт шаҳарча бўлиб, ўзининг гўзал табиати, қалъалари ва саройлари билан машҳур.
Уйига, Мумбайга қайтгач, Санайя иш бошқарувчи бўлиш учун Сиденҳам коллежига ўқишга киради. Аммо тез орада ўқишни ташлашга мажбур бўлади, чунки эронлик ёш соҳибжамол реклама роликларида чиқиш таклифларига тўлиб-тошганди.
Аввалига Санайя шоу-бизнес билан шуғулланишни истамайди, лекин онаси унга рад қилмасликни маслаҳат беради. Онаси қизини ҳар томонлама қўллаб-қувватлайди, чунки у Санайянинг муваффақиятли модел ёки актриса бўлишини жуда хоҳларди. Шундай қилиб, қиз коллеждан бир йил таътил олиб, реклама оламига шўнғийди.
Модель бўлгандан сўнг, Эроний тезда машҳурликка эриша бошлайди. Айтганча, унинг биринчи портфолиосини бир вақтлар фотограф бўлиб ишлаган актёр Боман Эроний тузган. 2006 йилда Санайя катта экранда биринчи марта пайдо бўлади, у “Жоним фидо” драмасида Кажолнинг дугонаси ролини ўйнайди. “Мен бу ролга тасодифан тасдиқланганман”, деб эслайди у.
Тўғрисини айтсам, ўйнайдиган нарсанинг ўзи йўқ эди, чунки роль эпизодик бўлган. Мен ҳеч қачон фильмларда роль ўйнашни орзу қилмаганман, шунинг учун “Жоним фидо” фильмида ўйнашга таклиф қилишганда, аввалига рад этдим. Ҳеч қандай салмоғи йўқ иккинчи даражали қаҳрамон сифатида экранда кўринишни хоҳламаслигимни айтдим. Фильм ижодкорларига 3 марта рад жавобини бердим. Лекин барибир мени кастингга чақиришди.
Ўша ердагина Амир Хон ва Кажол бош ролларни ижро этаётганини билиб қолдим. Ва бу ролга фақат уларнинг қандай ишлашини кўриш учунгина рози бўлдим. Менимча, улар ажойиб актёрлар! Ўшанда фақат реклама роликлари билан шуғулланардим, шунинг учун бир-икки ҳафталик суратга олиш ишлари ҳаётимга жуда катта таъсир кўрсатмасди.
Менда актриса бўлиш ва катта экранга чиқиш нияти бўлмаган. Агар ўтмишга қайта олганимда эди, бу ролга рози бўлмаган бўлардим”, — дейди актриса.
Шундан кейин унга “Чап, ўнг, чап” сериалининг иккинчи мавсумида курсант Самира Шрофф ролини таклиф қилишади.
“Аввалига жуда қийналдим, чунки ҳинд тилини яхши билмасдим. Режиссёр диалогларни сўзма-сўз, бўғинлаб талаффуз қилишни ўргатди. Бу машаққатли иш эди, лекин мен уддаладим. Ҳозир ҳиндчани анча яхши биламан”, — дейди Санайя.
2008 йилда актриса “Биз учрашганимизда” сериалида роль ўйнайди. Кичкина шаҳарчадан Мумбайга келган икки опа-сингил ҳақидаги фильм томошабинларга ёқади. Санайянинг ўзи эса партнёри Моҳит Сеҳгалнинг қалбини забт этади.
Моҳит интервьюсида бу ҳақда шундай деди:
“Мен Санайяни суратга олишнинг биринчи кунидаёқ севиб қолдим, лекин биринчи мавсумдан кейингина унга бўлган ҳис-туйғуларимни тан олдим. Биз дарҳол тил топишиб кетдик ва биринчи ойларда шунчаки дўст эдик. Аммо дўстимиз ва ҳамкасбимиз Аржун Бижлани Санайя билан бир-биримизга бефарқ эмаслигимизни ўша пайтдаёқ сезган экан.
У ғашимизга тегиб, бизни масхара қиларди: “Бир-бирингизни севиб қолгансизлар-ку! Тан олсангиз-чи”, дерди. Шубҳалар, ўзимга бўлган ишончсизликдан қийналардим. Аммо вақт ўтиши билан Санайя ер юзидаги энг яхши қиз эканлигини ва хавотир олишимга асос йўқлигини англадим.
Моҳит ва Санайя муносабатларини сир тутиб, сериал тугаганидан кейингина эълон қилади. 2016 йил 25 январда Гоа шаҳрида чиройли тўй ўтказилади.
Санайянинг Болливуд ҳақида ҳеч қандай тасаввури бўлмаган. У ҳар доим телевидениени яхши кўрган ва уни нафақат телесериалларда, балки клип, веб-сериал ва турли рақс реалити-шоуларининг иштирокчиси, ҳатто бошловчиси сифатида ҳам кўриш мумкин.
“Агар актриса бўлмаганимда, эҳтимол мода дизайнери ёки интерьер дизайнери бўлардим”, дейди Эроний. Бугунги кунга қадар у People журналининг “Энг гўзал 40 аёл” рўйхатига киритилган ягона телевидение актрисасидир.
2011 йилда Санайя Эрони “Муҳаббат тафти” сериалида роль ўйнаш учун шартнома имзолайди ва бу роль 28 ёшли қизга оламшумул машҳурлик олиб келади. Унинг қувноқ ва самимий Куши Кумари Гупта роли томошабинлар томонидан юқори баҳоларга сазовор бўлади.
Ушбу лойиҳада Санайя нафақат комедик, балки романтик актриса эканлигини ҳам исботлади. Унинг Барун Собти билан ижодий иттифоқи шунчалик омадли чиқадики, баъзи мухлислар Санайя ва Барун бир-бирини чинакам севганига ишонади ҳам.
“Муҳаббат тафти” бутун дунё бўйлаб миллионлаб томошабинларни экран қаршисига михлаб қўйди ва уларни иккига бўлди. Баъзилар бош қаҳрамонларни бир-бирига мос деб яхши кўришса, бошқалари эса фақат Барун учун ақлдан озиб, Санайяни унга мос келмайди деб ҳисоблайди. Шунинг учун актриса кўпинча Собти мухлисларининг нафратига учрайди.
“Муҳаббат тафти” сериалидан сўнг Санайя “Опа-сингиллар” ҳинд фильмидан илҳомланган “Чанчан” лойиҳасида иштирок этади, аммо томошабинларга фильм ёқмайди ва тезда бекор қилинади.
2013 йил охирида у Ashish Шарма билан биргаликда “Эҳтирос ранглари” мелодраматик лойиҳасида порлайди, бу фильм хитга айланади. Оддий қишлоқ қизи билан офицер ўртасидаги нафратдан бошланган муҳаббат ҳикояси севиб томоша қилинади.
Баъзи манбаларда Санайянинг автоҳалокатда вафот этгани ҳақида ёзишган. Бундан ташқари актрисанинг она бўлгани ҳақидаги видео ҳам бор. Бироқ буларнинг барчаси ёлғон хабарлар бўлиб, фақат томошабинлар қизиқишини уйғотиш ва кўришлар сонини орттириш учун қилинган.
Ҳозирда Санайя Эроний турмуш ўртоғи Моҳит билан бахтли. Уларнинг фарзанди йўқ, лекин актрисанинг иккита жияни бор — укасининг болалари Финн Уокер Эроний ва Слоан Харпер Эроний.
Айтганча, баъзи манбалар унинг опаси борлиги ҳақида ҳам ёзган, аммо бу нотўғри маълумот. У ва актриса Кашмира Эроний шунчаки фамилиядош холос.
Изоҳ (0)