Давлат дастурларини амалга оширишда қолоқликлар мавжуд ҳудудларга Президент Администрацияси, ҳукумат, Ҳисоб палатаси ва вазирликлардан масъул раҳбарлар йил якунига қадар бириктирилади. Бу ҳақда Президент Шавкат Мирзиёев раислигида ўтказилган видеоселектор йиғилишида давлат раҳбари қайд этди, дея хабар бермоқда «Дарё» мухбири.
«Очилбой Раматов, Жамшид Қўчқоров, Ботир Зокиров вилоят, туман ва шаҳар ҳокимлари билан бирга икки ҳафта муддатда барча объектлар бўйича лойиҳа-смета ҳужжатларини якунлаб, қурилиш-таъмирлаш ишларини бошлаши зарур. Бунда бир ҳафта муддатда боғча, мактаб, оилавий шифокор пункти, поликлиника каби ижтимоий соҳа объектларини бўйича лойиҳа ҳужжатлари якунига етказилиши керак.
Бош прокурор ўринбосари Мавлонов дастурлар доирасида амалга оширилаётган ишлар юзасидан кунлик назоратни кучайтириб, ҳар ҳафта камида 2 тадан вилоятга чиқади ва муаммоларни бартараф этишга кўмаклашади.
Шунингдек, дастурларни амалга оширишда қолоқликлар мавжуд ҳудудларга Президент Администрацияси, ҳукумат, Ҳисоб палатаси ва вазирликлардан масъул раҳбарлар йил якунига қадар бириктирилади.
Бунда:
- Турсунхон Худайбергенов – Қорақалпоғистон ва Жиззах вилоятига;
- Очилбой Раматов – Қашқадарё ва Самарқандга;
- Президент маслаҳатчисининг биринчи ўринбосари Исломов ва Ҳисоб палатаси раисининг ўринбосари Саидкаримов – Тошкент вилоятига;
- Президент маслаҳатчисининг ўринбосари Усмонов – Тошкент шаҳрига;
- Пўлат Бобожонов – Хоразмга;
- Раҳмат Маматов – Бухорога;
- Ботир Парпиев – Сурхондарёга;
- Қўлдошев – Сирдарёга бориб барча масалаларни жойида ҳал этишга ёрдам беради.
Президент бош вазир ўринбосари Очилбой Раматов вилоят, туман ва шаҳар ҳокимлари билан бирга дастурларда 2021 йил учун белгиланган барча ишларни 1 октябрга қадар якунлаши кераклигини таъкидлади.
Бундан аввал «Обод қишлоқ» ва «Обод маҳалла» доирасидаги ишлар сифатсиз олиб борилаётгани ҳақида Бош прокуратурага мурожаат қилиш бўйича янги тизим ишга туширилгани, Ўзбекистонда 2021 йилда 8 мингга яқин қишлоқ ва маҳаллада қурилиш-таъмирлаш ишлари амалга оширилиши ҳамда Ўзбекистондаги қишлоқ ва маҳаллаларда аҳоли шароитини яхшилаш учун 2021 йилда жами 21 трлн сўм маблағ йўналтирилиши ҳақида хабар берилганди.
Изоҳ (0)