Майкл Жексоннинг Pepsi рекламасида кийган чарм курткаси аукционга қўйилди (видео)

Америкалик хонанда, поп қироли Майкл Жексоннинг 1984 йилги Pepsi рекламасида кийган чарм курткаси Лондондаги Propstore аукционида сотилади. Аукцион ноябрь ойида бўлиб ўтади, деб ёзмоқда “Корреспондент.нет” нашри.

Куртка илгари Уэнделл Томпсон исмли инсонга тегишли бўлиб, унинг отаси Майкл Жексон билан бирга ишлаган косметолог бўлган. Лот билан бирга Майкл Жексон ушбу курткани кийиб, Уэнделл Томпсон билан тургани акс этган сурат ҳам қўшиб берилади.

1984 йилда Pepsi реклама ролигини суратга олиш вақтида пиротехника воситаси портлайди ва хонанданинг сочлари ёниб кетади. Яхшиямки, жамоа оловни ўчиришга муваффақ бўлади. 

Мутахассисларнинг фикрича, чарм куртканинг нархи 230 минг доллардан 460 минг долларгача баҳоланиши мумкин.

Шунингдек, кимошди савдосига Эми Вайнгаузнинг You Know I’m No Good клипида кийган париги ва Жорж Майкл ва Арета Франклиннинг La Rockа деб номланган дуэтида кийган кўйлаги ҳам қўйилади.

Шунингдек, кимошди савдосига Lost Weekend фильмидаги Жон Ленноннинг камари ва Девид Бовейнинг Liza Jeyn синглининг асл намунаси ҳам киритилган.