“Коррупция 1-синфга қабулда кўпроқ учрамоқда” — Мактабгача ва мактаб таълими вазирлиги бошқарма бошлиғи Шавкат Ҳамраев

Мактабгача ва мактаб таълими вазирлигида 9 декабрь — Халқаро коррупцияга қарши курашиш куни муносабати билан “Очиқ эшиклар куни” тадбири ташкил этилди. Мулоқотда вазирлик соҳада коррупциявий қонунбузарлик ҳолатларининг олдини олиш ва бартараф этиш борасида вазирлик томонидан бажарилган ишлар таҳлил қилинди.

Вазирлик бошқарма бошлиғи Шавкат Ҳамраевнинг “Дарё” мухбирига маълум қилишича, жорий йилда 116 нафар ходим томонидан коррупциявий жиноят содир этилгани аниқланган.

“Мактабгача ва мактаб таълими соҳасида коррупциявий жиноятлар сони сезиларли камайиб бормоқда. Масалан, 2022 йилда тизимдаги 191 нафар ходим жиноят содир этган. Жорий йилда коррупциявий ҳуқуқбузарликка қўл урганлар сони 116 кишини ташкил этди. Бунда 1-синфга қабул қилиш жараёнида кўпроқ коррупция учрамоқда. Яъни болаларни мактабга жойлаётган пайтда таниш-билишчилик бўлади, ёши кичик болани ўқишга қабул қилиш ҳолатлари ҳам учрайди афсуски. Шундай ҳолатларнинг олдини олиш мақсадида 1-синфга қабул, бир мактабдан бошқасига кўчириш ва шаҳодатномалар бериш тизими электрон шаклга ўтказилди”, —деди вазирлик масъули.

Тадбирда жорий йилнинг 9 ойи ичида Мактабгача ва мактаб таълими вазирлиги тизими аниқланган молиявий хато ҳамда камчиликлар ҳисоботи ҳам берилди. Вазирлик департаменти директорининг ўринбосари Ҳусниддин Мустафоевнинг айтишича, вазирлик тизимидаги ташкилотларда ўтказилган назорат тадбирларида қарийб 954,9 миллиард сўмлик молиявий хато ва камчиликлар аниқланган.

“Шундан иш ҳақи ва унга тенглаштирилган тўловларга давлат бюджетидан 19 миллиард сўм ноқонуний сарфланган. Бажарилмаган иш ҳажми ва хизматлар учун 7,9 миллиард сўм ортиқча тўлов қилинган. “Давлат харидлари тўғрисида”ги қонун талабларини бузиб сарфланган маблағлар миқдори 22 миллиард сўмни ташкил этган. Харажатлар сметасига ортиқча режалаштирилган маблағлар 3,2 миллиард сўм, самарасиз харажатларга 7 миллиард сўм, ортиқча товар моддий камомадларига 5,7 миллиард сўм сарфланган. Бундай ҳолатлар юзасидан ҳисоботлар расмийлаштирилиб, ҳуқуқни муҳофаза қилувчи органларга юборилган”,—деди вазирлик вакили.

Мулоқотда маълум қилинишича, шу йилнинг 9 ойи давомида вазирликда олтита ҳолатда давлат харидлари бекор қилинган ва масъулларга нисбатан интизомий жазо қўлланган. Мактабгача ва мактаб таълими соҳасига ажратилган маблағларни самарали ва мақсадли ишлатиш бўйича ўтказилган 4 та назорат ва мониторинг тадбирларида аниқланган молиявий хато ҳамда камчиликлар бўйича 5 нафар ходим жазоланган. 

Тадбирда соҳада пора олиш ва пора бериш хавфларини юзага келиш сабаб ҳамда шарт–шароитларини олдини олиш бўйича “Йўл харитаси” ишлаб чиқилиб, Коррупцияга қарши курашиш миллий кенгашига киритиш учун Коррупцияга қарши курашиш агентлигига юборилгани таъкидланди.