Франция молия прокуратураси республика меҳнат, тўлиқ бандлик ва интеграция вазири Оливье Дюссони таниш-билишчиликка йўл қўйгани учун 10 ойлик шартли қамоқ ва 15 минг евро миқдорида жаримага тортишни талаб қилди. Бу ҳақда AFP хабар берди.
Вазир 2009 йилда ўтказилган тендерлардан бирида “Саур” сув хўжалиги компаниясининг иштироки учун қулай шарт-шароитлар яратганликда гумон қилинмоқда.
Прокуратура тинтув пайтида вазирдан топилган иккита ҳужжатга таяняпти. Биринчиси, 2009 йил июль ойи охирида Аннонай коммунасининг ўша пайтдаги мери Дюссо ва “Саур” директори Оливье Броуссат ўртасидаги учрашув ҳақида маълумот. Учрашув тендер эълон қилинишидан уч ой олдин бўлиб ўтган ва унда тендер шартлари ва шартнома суммаси муҳокама қилинган.
Иккинчи ҳужжат бу — учрашувдан сўнг кўп ўтмай шаҳар ҳокимлигидан тендерни тайёрлаш учун масъул бўлган хизмат вакилига юборилган электрон почта. Унда бир қанча бандларни ўзгартириш ва номзодлар таклифларини баҳолашда нарх мезонининг аҳамиятини камайтириш талаби бўлган.
Изоҳ (0)