Ўзбекистоннинг қатор ҳудудларида кучли таъсир қилувчи дори воситалари савдосига чек қўйилди

Андижон, Бухоро ва Сурхондарё вилоятларида тегишли ҳужжатлари бўлмаган ҳамда кучли таъсир қилувчи дори воситаларининг муомалага киритилишига чек қўйилди, деб хабар беради Бош прокуратура ҳузуридаги департамент.

Қайд этилишича, департамент, ДХХ ва ИИБ Андижон вилояти бошқармалари томонидан ҳамкорликда Олтинкўл туманида тезкор тадбир ўтказилган. Тадбирда фуқаро Б.Қ. бошқарувидаги Damas русумли автотранспорт воситаси тўхтатилиб кўздан кечирилганда, фуқаро I.М.га тегишли ҳеч қандай ҳужжатсиз 1 200 дона “Пантозол” номли хорижда ишлаб чиқарилган дори воситасини ўтказиш мақсадида олиб кетаётгани аниқланган. Шунингдек, фуқаро I.М. Андижон шаҳри “Ҳ.” МФЙдаги хонадонида ушбу дори воситасидан яна 3 799 донасини сотиш мақсадида сақлаб келаётгани маълум бўлган.

Шу каби, департаментнинг Когон шаҳар ва Самарқанд туман бўлимлари томонидан ДХХ ва ИИБ ходимлари билан ҳамкорликда ўтказилган тезкор тадбирларда “М.Ф.” МЧЖга қарашли дорихона сотувчиси С.Ш. ҳамда “С.Д.” хусусий корхонасига қарашли дорихона сотувчиси З.Т. ҳеч қандай ҳужжатсиз жами 410 дона “Тебантин” ва “Габапентин” номли дори воситасини сотаётган вақтида ушланиб, яна 640 дона “Тебантин” номли дори воситаси ашёвий далил сифатида олинган.

Худди шундай, департаментнинг Сурхондарё вилоят бошқармаси, Қизириқ туман бўлими томонидан ДХХ ходимлари билан ҳамкорликда ўтказилган тезкор тадбирларда “Б.Г.” МЧЖ, “Ж.Ф.” ва “П.Н.” хусусий корхонасига қарашли дорихона сотувчилари жами 201 дона “Тебантин” ва “Габапентин” номли дори воситаларини сотган вақтларида ушланиб, яна 100 дона “Тебантин” дори воситаси ашёвий далил сифатида олинган.

Департаментнинг Жарқўрғон ва Оққўрғон туман бўлимлари томонидан ИИБ ходимлари билан ҳамкорликда ўтказилган тезкор тадбирларда эса “Д.П.” МЧЖ раҳбари О.А. ва фуқаролар Л.Ғ., Ж.Н. жами 107 дона “Зардекс” номли кучли таъсир қилувчи дори воситасини сотаётган вақтида ашёвий далиллар билан ушланган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.

Бундан олдин Сирдарёда психотроп дорилар савдоси билан шуғулланган шахслар қўлга олингани, ДХХ Тожикистон ва Қирғизистондан келтирилган гиёҳванд моддалар савдоси билан шуғулланувчи шахсларни ушлагани, Тошкент вилоятида ўтказилган назорат-рейд тадбирларида синтетик гиёҳванд воситаларини тайёрловчи лаборатория ташкил қилган шахслар қўлга олингани тўғрисида хабар берилганди.