Самарқанд шаҳрида ўтказилган Ўзбекистон—Франция бизнес форуми доирасида соғлиқни сақлаш вазири Амрилло Иноятов ҳамда Фармацевтика тармоғини ривожлантириш агентлиги директори Абдулла Азизов Франциянинг Boehringer Ingelheim компанияси раиси Кристиан Вижсен билан музокаралар олиб борди. Бу ҳақда ССВ матбуот хизмати хабар берди.
Boehringer Ingelheim биологик ва онкологик препаратларни шартнома асосида ишлаб чиқиш ва ишлаб чиқариш бўйича хизматлар кўрсатувчи компанияларнинг етакчи йигирматалигига киради.
Қайд этилишича, мулоқот давомида респиратор, юрак-қон томир ва онкологик хасталиклар, ОИВ, тромбоэмболиялар, сереброваскуляр касаллик, қандли диабет, гепатит ҳамда Паркинсонни даволашга мўлжалланган дори воситаларини ишлаб чиқарувчи мазкур компания раҳбарияти билан маҳаллийлаштириш имкониятларини чуқур ўрганишга келишиб олинган.
Шунингдек, Амрилло Иноятов Франциянинг Airbus Helicopters компанияси раҳбарияти билан учрашган.
Музокара давомида Республика тез тиббий ёрдам тизими учун 10 та Airbus Н-145 русумли тиббий вертолётларни харид қилиш ҳамда мамлакатда Европа стандартларига мос тиббий авиация хизматини ташкил этиш, бу соҳанинг моддий-техника базасини яратиш ҳамда мутахассислар тайёрлаш, тоғли ва чекка ҳудудларда тиббий авиация хизматини ташкил этиш механизмларини ишлаб чиқиш истиқболларини муҳокама қилган.
Ўзбекистонда 2024 йил учун мўлжалланган бюджет параметрларига кўра, Соғлиқни сақлаш вазирлигига 4 триллион 587 миллиард 244,7 миллион сўм ажратилиши кўзда тутилган.
Изоҳ (0)