Ўзбекистонда дронлардан ноқонуний фойдаланганлик учун белгиланган жавобгарлик енгиллаштирилмоқда. Бу кўзда тутилган қонун лойиҳаси Парламент қуйи палатасидаги ХДП фракциясининг навбатдаги йиғилишида муҳокама қилинди.
“Бугунги кунда фуқаролар ва хорижий сайёҳлар томонидан учувчисиз учадиган аппаратлар олиб келинганда уларга нисбатан жиноят иши қўзғатилиши ва процессуал ҳаракатлар амалга оширилиши, интернет тармоғида жамоатчилик томонидан кескин муҳокама ва мунозараларга сабаб бўлиб, мамлакатимизнинг имиджига салбий таъсир кўрсатмоқда”, — деб қайд этган депутатлар.
Вазиятни “Айрим тоифадаги жиноий қилмишлар учун жавобгарлик либераллаштирилиши муносабати билан Ўзбекистон Республикасининг Жиноят кодексига ҳамда Ўзбекистон Республикасининг Маъмурий жавобгарлик тўғрисидаги кодексига ўзгартириш ва қўшимчалар киритиш ҳақида”ги қонунни қабул қилиш орқали юмшатиш режалаштирилмоқда.
Ушбу ҳужжат билан Маъмурий жавобгарлик тўғрисидаги кодекс учувчисиз учадиган аппаратларни, уларнинг бутловчи ва эҳтиёт қисмларини қонунга хилоф равишда олиб кириш, ўтказиш, олиш, сақлаш ёки улардан фойдаланиш ҳаракатларини содир этганлик учун маъмурий жавобгарликни назарда тутувчи 185-4-модда билан тўлдирилмоқда.
Шунингдек, Жиноят кодексининг 244-4-моддасида белгиланган санкцияларга муқобил жарима, ахлоқ тузатиш ишлари, озодликни чеклаш каби жазо турлари киритиляпти.
Қонун лойиҳаси ташаббускорларининг айтишича, лойиҳанинг қабул қилиниши учувчисиз учадиган аппаратларни Ўзбекистон ҳудудига олиб кириш ва ундан фойдаланишнинг ўрнатилган тартиб қоидаларини ўзгартирмаган ҳолда, бугунги кунда жамоатчиликда юзага келаётган эътирозли кайфиятни юмшатиш имкониятини яратади.
Маълумот учун, амалдаги Жиноят кодексига кўра, учувчисиз учадиган аппаратларни, уларнинг бутловчи ва эҳтиёт қисмларини қонунга хилоф равишда олиб кириш, ўтказиш, олиш, сақлаш ёки улардан фойдаланиш 3 йилгача озодликдан маҳрум қилиш билан жазоланади.
Изоҳ (0)