“Бойларнинг имтиёз олиш тактикаси”: Женнифер Лопес ва Бен Аффлек уй харид қилиш учун 20 миллион доллар ипотека кредити олди (фото)

Голливуднинг юлдузли жуфтлиги нақд тўловни амалга оширгандан бир неча ой ўтгач, 30 йиллик ипотека асосида уй сотиб олишга қарор қилди. Эксперт Женнифер Лопес ва Бен Аффлекнинг ҳаракатларини баҳолади.

Хонанда ва актёр май ойида ўзлари орзу қилган уйини сотиб олди. Жанубий Калифорниядаги Уоллингфорд мулки деб номланган қасрнинг нархи 60,85 миллион долларни ташкил этади. Маълум бўлишича, жуфтлик дастлабки нақд тўловдан кейин 20 миллион долларга ипотека кредити олган.

Лопес ва Аффлек оилавий яшайдиган уйни бизнес менежерлари Гари Кресс ва Брайан Мерфи томонидан бошқариладиган ишончли фонд орқали сотиб олди. Битимдан бир неча ой ўтгач, Женнифер ва Бен JPMorgan Chase Bankz’дан 30 йиллик ипотека кредитини танлади.

12 та ётоқхонали, 24 та ҳаммомли уйнинг ипотекаси дастлабки олти йил учун 5,5 фоизли ставкага эга бўлади. Асосий қарз ва фоизларни тўлашнинг тахминий бошланиш санаси 2033 йилнинг ноябрь ойига тўғри келади.

Лопес ва Аффлекнинг ипотека кредитини Лос-Анжелесда жойлашган Ruby Home Luxury Real Estate компанияси бош директори Тони Мариотти баҳолади. Мутахассис бу қарорни “оқилона молиявий ҳаракат” деб атади.

Мариотти таъкидлаганидек, юлдузли жуфтлик ақл билан иш тутган. “Кўчмас мулк гарови кредити фоиз ставкаси бўйича оддий истеъмол кредитига нисбатан пастроқ. Бундан ташқари, фоизлар ҳам солиққа тортилмайди. Улар маблағларни хоҳлаганча ишлатиши мумкин”, — дея тушунтирган Тони.

Ҳашаматли мулк бўйича эксперт Daily Mail’га бу келишувни “бой инсонларнинг солиқ имтиёзлари бўйича кенг тарқалган тактикаси” деб таърифлади.

Уй илк марта 2018 йилда сотувга қўйилган. Ўша пайтда уйнинг қиймати 135 миллион доллар бўлган, бироқ бу йил қайта рўйхатга олинганида бу нарх деярли икки баробарга камайди.

Уй беш гектар майдонда жойлашган бўлиб, ҳудудда асосий уйдан ташқари хизматчилар ва қўриқчилар учун уйлар, меҳмонлар учун уй, 12 та машинага мўлжалланган гараж мавжуд. Уйдан унча узоқ бўлмаган жойда 80 та ўринга эга қўшимча автотураргоҳ бор — у ерда катта зиёфатлар ҳам бўлиб ўтади.

Жуфтликнинг ихтиёрида соч турмаклаш ва маникюр салони, уй кинотеатри, вино ертўласи, виски бар, шунингдек, сауна ва массаж хоналари мавжуд. Катта сузиш ҳавзаси асосий уйнинг орқасида жойлашган. Ҳудудга иккита алоҳида кириш жойи мавжуд.

Улар Уоллингфорд мулкини сотиб олишдан олдин Лопеснинг Калифорния штатида жойлашган Бел Air яқинидаги уйида яшаган. Бен ва Женнифер оилавий яшайдиган уйни қидириш учун бир йилдан кўпроқ вақт сарфлади.