Ўзбекистонда 2023 йилнинг сентябр ойида инфляция 1,24 фоизни ташкил этди. Бу ҳақда Статистика агентлигининг Истемол нархлари индексига оид ҳисоботида сўз боради.
Қайд этилишича, бу сўнгги уч йил ичида ушбу ойдаги энг юқори кўрсаткич (2021 йил — 1,09 фоиз, 2022 йил — 1,03 фоиз), шунингдек, 2023 йил бошидан буён энг катта нарх ўсишидир. Ўтган ойда озиқ-овқат маҳсулотлари ўртача 1,8 фоизга, ноозиқ-овқат маҳсулотлари 1 фоизга, хизматлар 0,6 фоизга қимматлашган.
Йил бошидан (январь-сентябр) инфляция 5,13 фоизгача ошган, йиллик инфляция (ўтган йилнинг сентябр ойига нисбатан) 9,19 фоизга (8,96 фоиз) тезлашган. Йил давомида озиқ-овқат маҳсулотлари ўртача 11 фоизга, ноозиқ-овқат маҳсулотлари 7,6 фоизга, хизматлар 8,2 фоизга қимматлашган.
Шунингдек, ўтган бир ой ичида алкоголли ичимликлар нархи 0,3 фоизга, тамаки маҳсулотлари 2,3 фоизга ошган. Бир қатор ҳудудларда уй-жой ижараси тўловлари ошди (республика ўртача 2,4 фоизга). Антигистаминлар (аллергия препаратлари) нархи 1,8 фоизга қимматлашган.
Бундан олдин Қишлоқ хўжалиги вазирлиги ахборот хизмати “Дарё” нашрига бозорларда ун нархи ортиши ва унинг ортидан нон ҳамда нон маҳсулотлари нархи кўтарилиб кетгани ҳақидаги хабарлар юзасидан изоҳ берганди.
Марказий банк 2023 йил якуни бўйича инфляция даражаси 8,5–9,5 фоиз атрофида бўлишини прогноз қилганди.
2022 йилда йиллик инфляция 12,3 фоизни ташкил этган. 2021 йилда бу кўрсаткич 9,98 фоиз, 2020 йилда 11,1 фоиз, 2019 йилда 15,2 фоиз, 2018 йилда 14,3 фоиз, 2017 йилда 14,4 фоиз бўлган.
Инфляция ўзи нима?
Инфляция деганда мамлакатдаги товар ва хизматлар баҳоси умумий даражасининг ошиши (ўсиши) тушунилади. Унинг асосий кўрсаткичи истеъмол нархларининг маълум бир даврдаги ўзгариши ҳисобланади. Нархларнинг умумий даражаси кўтарилиши натижасида мамлакат пул бирлиги (миллий валюта) харид қобилиятининг пасайиши рўй беради. Бу эса ўз навбатида, давлат пул бирлигининг қадрсизланишига олиб келади.
Изоҳ (0)