Жидда шаҳрида Ўзбекистон ва Саудия Арабистони ўртасида меҳнат миграцияси соҳасидаги ҳамкорлик истиқболлари муҳокама қилинди, деб хабар бермоқда “Дунё” АА.
Маълум қилинишича, Ўзбекистоннинг Жидда шаҳридаги бош консули Нодиржон Турғунов республика фуқароларини чет элда иш билан таъминлашга кўмаклашиш мақсадида Саудия Арабистонидаги International Recruitмент Company бандлик компанияси менежери Аҳмад Муҳаммад Иброҳим билан учрашди.
Мулоқот чоғида ўзбекистонликлар учун подшоҳлик хусусий тармоғида бўш иш ўринларининг яратиб берилиши, ўзбек меҳнат муҳожирларининг қонуний ишлашини таъминлаш масалалари муҳокама этилган. Ўз навбатида, менежер Аҳмад Муҳаммад Иброҳим Саудия бандлик компанияси вакили сифатида Ўзбекистондан ишчи кучини олиб келишга катта қизиқиш билдирган.
Унинг маълум қилишича, International Recruitмент Company компанияси Жидда шаҳрида жойлашган бўлиб, подшоҳлик ҳудудларида 37 та шўбаси мавжуд. Ушбу компания Саудия Арабистонидаги энг йирик бешта бандлик компанияларидан бири бўлиб, компания ва унинг шўбаларида жами 15 минг нафар ишчи фаолият юритади. Компаниянинг асосий мақсади — барча соҳаларга малакали ишчиларни жалб этишдан иборат.
Шу ўринда Аҳмад Муҳаммад Иброҳим Ўзбекистондан араб ёки инглиз тилини биладиган ошпазлар, автобус ва юк машиналари ҳайдовчилари, тиббиёт ходимлари ва бошқа соҳалар бўйича малакали мутахассисларни жалб этишга тайёрлигини билдирган.
Аввалроқ подшоҳлик тарафидан иш берувчиларнинг имкониятлари ва талабларини ўрганиб чиқиш мақсадида Камбағалликни қисқартириш ва бандлик вазирлиги ҳамда унинг тасарруфидаги Меҳнат миграцияси агентлиги масъулларидан иборат техник қўмита тузилиб, тез фурсатда фаолиятини бошлаш борасида келишиб олингани ҳақида хабар берилган эди.
Изоҳ (1)
Qachondan yoki qayerga murojat qilamiz bu boyicha Saudiya Arabistoniga ishlash uchun