Сурияда жангарилар сафига бориб қўшилган ўзбекистонлик оилага нисбатан жиноят иши қўзғатилиб, қидирувга берилди. Бу ҳақда пойтахт ИИББ матбуот хизмати маълум қилди.
Қайд этилишича, 1969 йилда Тошкент вилоятида туғилган фуқаро Й.Т. муқаддам Жиноят кодексининг 159- (Ўзбекистон Республикасининг конституциявий тузумига тажовуз қилиш) ҳамда 244-1-моддалари (Жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) билан судланган.
Фуқаро Й.Т. 2014 йилда ишлаш мақсадида 1972 йилда туғилган турмуш ўртоғи Ҳ.Т., ўғиллари — 1991 йилда туғилган О.Б., 1993 йилда туғилган Ҳ.Б., 1998 йилда туғилган М.Б. ҳамда 1994 йилда туғилган келини Н.Б. билан Россияга ишлаш мақсадида бориб, у ерда ижтимоий тармоқларда диний-экстремистик ва террористик ташкилотларнинг ғояларини тарғиб қилувчи турли аудио-видеоматериаллар таъсирига тушиб қолган.
Фуқаро Й.Т. “Узейир тоға” лақаби билан танилган бўлиб, ижтимоий тармоқлар орқали ёшларни Сурияга боришга даъват қилиб келади. Маълумотларга кўра, у Сурияда “Тавҳид ва жиҳод” халқаро террорчилик ташкилоти жангариларга ошпазлик қилади ва оила аъзолари билан бирга жанговар ҳаракатларда қатнашиб келмоқда.
Ҳозирда ҳуқуқни муҳофаза қилувчи органлар томонида Й.Т. ҳамда унинг оила аъзоларига нисбатан Жиноят кодексининг тегишли моддалари билан жиноят иши қўзғатилган бўлиб, қидирув эълон қилинган.
Бундан аввал халқаро террорчилик ташкилоти сафларига қўшилган ўзбекистонлик эркак ва унинг ўғли қидирувга берилгани хабар қилинганди. Шунингдек, қизлари билан халқаро террорчилик ташкилоти жангарилари аъзоси бўлган ўзбекистонлик аёл ҳам қидирилмоқда. Ушбу аёл ҳам Россияда яшовчи эркак билан танишиб, икки қизи билан дастлаб Озарбайжон орқали Туркияга, у ердан эса Сурияга борган ва халқаро террорчилик ташкилотининг жангариларига бориб қўшилган.
Изоҳ (0)