Александр Лукашенконинг айтишича, Россияда “Вагнер” қуролли исёни бошланган пайтда Беларусь армияси тўлиқ шай ҳолатга келтирилган.
“Россиядаги воқеалар содир бўлганда, мен армияни тўлиқ жанговар шай ҳолатга келтириш бўйича барча буйруқларни бердим. Ҳеч ким, ҳаттоки, Telegram-каналларда ҳам бунга қарши чиқишмади. На оилалар, на аёллар, на болалар ва қариндошлар — ҳеч ким. Куннинг иккинчи ярмида армия, барча Қуролли кучлар, жумладан полиция, махсус бўлинмалар тўлиқ жанговар шай ҳолатга келтирилди”, — дея Лукашенконинг сўзларидан иқтибос келтирмоқда “БелТА”.
Беларусь президенти юқори мартабали зобитларга погон топшириш маросимидаги нутқида Беларусь мухолифатининг “Вагнер” исёни пайтидаги ҳаракатларига ҳам изоҳ бериб ўтди.
“Улар ҳатто навбатдаги чақириқлар ва режаларини эълон қилишга муваффақ бўлди. Ҳисоб бериш керакки, улар ҳам қуролли исённинг яна бир сценарийсини амалга оширишга тайёр. Бундай ҳолатлар аввал ҳам бўлган”, — деди у.
Россиядаги исён пайтида Беларусь мухолифати вакиллари Беларусь фуқароларига мурожаат билан чиққанди. Хусусан, Беларусь демократик кучлари етакчиси Светлана Тихановская Россия президенти Владимир Путин “Беларусь ҳарбийларини ўзининг ички можаросига тортишга ҳаракат қиляпти”, деб айтди. У, шунингдек, тезкор штаб ташкил этилганини эълон қилди ва Россия билан чегарани ёпишга чақирди. Бундан ташқари, у Россия қўшинларини мамлакатдан чиқариб юбориш кераклигини таъкидлади. Ўз навбатида, штаб раҳбари Валерий Сахашик беларус ҳарбийларига мурожаат қилиб, уларни “мамлакатни сақлаб қолиш” учун бирлашишга чақирди.
“Вагнер”нинг 24 соатлик қуролли қўзғолони гуруҳ асосчиси Евгений Пригожин ва Россия ҳукумати ўртасидаги келишув билан якунланди, унга кўра “Вагнер” ёлланма аскарлари Россия Мудофаа вазирлиги хизматига кирмайди ёки қариндош ва дўстлари ёнига қайтмайди, улар “Беларусга жўнаб кетиши” мумкин. 27 июнь куни эрталаб Пригожиннинг шахсий самолёти Минск яқинидаги ҳарбий аэродромга қўнгани маълум бўлди. Унинг ўзи бортда бўлганми ёки йўқлиги номаълум.
Изоҳ (0)