Қирғизистон пойтахти Бишкекда сувнинг кескин танқислиги кузатилмоқда. Ҳукумат сувни тежаш мақсадида шахсий ҳаммомлар, бассейнлар ва автоювиш шохобчаларини вақтинча ёпмоқда. Бу ҳақда пойтахт ҳокимлиги матбуот хизмати хабар берди.
Бундай қарор Бишкек шаҳар ҳокими ўринбосари Жиргалбек Шамиралиев ва тегишли идоралар раҳбарлари томонидан шаҳар бўйлаб ўтказилган рейд давомида қабул қилинган. Қирғизистон пойтахти ичимлик суви Орто-Алиш ва Ала-Арча ерости сувлари конларининг 37 та сув олиш иншооти ҳисобига таъминланади.
Сув таъминотининг асосий манбаи Орто-Алиш сув иншоотидир. У ичимлик сувининг 40 фоиздан ортиғини таъминлайди. Айни пайтда чуқурлиги 160-250 метр бўлган 334 та артезиан қудуғидан фойдаланиш ишлари олиб борилмоқда.
Сўнгги йилларда аҳолини ёзда ичимлик суви билан таъминлашда катта муаммо юзага келди. Бир киши 170 литр ўрнига 410 литр сув истеъмол қилмоқда, яъни истеъмол ҳажми 241 фоизга ошди.
Сув етишмаслигига ичимлик сувидан яшил майдонлар, томорқа ва экинларни суғоришда кенг фойдаланилаётгани сабаб бўлмоқда.
Мерия ходимлари Бишкекнинг бир қанча кўчаларида автоювиш шохобчаларини текширди.
“Битта автоювиш жойи ёпилди, бироқ автоювиш эгаларида кўпинча 10 тонналик резервуар мавжуд. Бу уларга бир ойга етади”, — деди шаҳар ҳокимлиги инспектори.
“Бишкекводоканал”га Чўн-Алиш канали ва Ала-Арчи дарёсидан кўлларни тўлдириш бўйича барча чораларни кўриш, шунингдек, муқобил сув ўтказгич қуриш бўйича ҳисоб-китобларни амалга ошириш топширилди.
Чуй сув хўжалиги бошқармаси билан кўлларни тўлдириш учун 11 миллион куб метр сув етказиб бериш бўйича келишувга эришилган, бироқ музликлар секин эриши туфайли кўзланган мақсадга эришилмаган.
Пойтахт аҳолисини сув билан таъминлаш учун сув тармоғи ва насос станцияси қурилмоқда, кўпроқ қудуқларни бурғулаш учун сув олиш майдонлари кенгайтирилмоқда.
Коротовских Евгений, Қирғизистон
Изоҳ (0)