Oliy sud raisi 87 ta, bosh prokuror va ichki ishlar vaziri 47 tadan, viloyat hokimi 93 ta: Bo‘kadagi qabulda nechta muammoga joyida yechim topilgani maʼlum qilindi

Toshkent viloyatining Bo‘ka tumanida Oliy sud raisi, bosh prokuror, ichki ishlar vaziri hamda viloyat hokimi ishtirokida katta sayyor qabul tashkil etilib, qabul jarayonining o‘zida 274 ta muammoga joyida yechim topildi. Bu haqda “Daryo”ga respublika ishchi guruhi axborot xizmati xabar berdi.

“Davlat rahbari topshirig‘i asosida tuzilgan respublika ishchi guruhining Toshkent viloyatidagi faoliyati katta masshtabdagi ommaviy qabul bilan boshlandi. Bo‘kaning ‘Bo‘ston’ mahallasidagi ochiq-jonli muloqotlar maydonida prezident Xalq qabulxonalari, Oliy sud, Bosh prokuratura, Ichki ishlar vazirligi, qo‘mitalar va Toshkent viloyati sektorlari rahbarlari har bir ariza-shikoyatni sinchiklab ko‘rib chiqdi”, — deydi ishchi guruh axborot xizmati masʼuli Mansur Abdusattorov.

Taʼkidlanishicha, ommaviy sayyor qabulda viloyatning O‘rta Chirchiq, Yuqori Chirchiq, Quyi Chirchiq, Parkent, Olmaliq, Piskent, Bekobod, Oqqo‘rg‘on, Qibray, Zangiota, Chinoz, Ohangaron tumanlari va Nurafshon, Chirchiq, Angren, Ohangaron, Bekobod shaharlaridan kelgan fuqarolar murojaati o‘rganilgan.

“Murojaatlarning 52,2 foizi sud, prokuratura va ichki ishlar faoliyatiga oid masalalarni tashkil qildi. Oliy sud raisi B.Islomov tomonidan 122 ta murojaat qabul qilinib, 87 tasiga joyida ijobiy yechim topilgan. 76 ta murojaat bo‘yicha o‘rganish talab etilgani sababli nazoratga olingan. Bosh prokuror N.Yo‘ldoshev va bosh prokuror o‘rinbosari S.Artikova tomonidan 160 nafar fuqaro qabul qilinib, 47 ta masala ijobiy hal etildi. 113 ta murojaat bo‘yicha o‘rganish talab etilgani sababli nazoratga olingan. Ichki ishlar vaziri P.Bobojonov va IIV o‘rinbosari Ya.Abdulhaqov tomonidan 102 nafar fuqaro qabul qilinib, 47 tasi ijobiy hal etildi. 54 ta murojaat bo‘yicha o‘rganish talab etilgani sababli nazoratga olindi. Viloyat hokimi Z.Mirzayev tomonidan 307 nafar fuqarodan murojaat qabul qilingan bo‘lib, murojaatlarning 93 tasi joyida hal etilgan. 214 ta murojaat bo‘yicha o‘rganish talab etilgani sababli nazoratga olingan”, — deyiladi ishchi guruh axborot xizmati bergan maʼlumotda.

Qayd etilishicha, bekobodlik Safaroy Berdiyeva mahallasidagi yuz nafar xotin-qizni kooperatsiyaga biriktirib, kiyimlar tayyorlashini bildirar ekan, bosh prokurordan mahsulotlar realizatsiyasida amaliy yordam so‘ragan. Murojaatdan so‘ng kooperatsiya uchun tez orada bozordan joy ajratiladigan bo‘lgan. Ichki ishlar vazirligi masʼullari bilan muloqotdan so‘ng 6 nafar sobiq ichki ishlar xodimi tizimga ishga tiklangan. Toshkent viloyati hokimligi mahalliy budjetidan bo‘kalik og‘ir ijtimoiy ahvoldagi oilalar muammolarini hal qilish uchun 721 million so‘m mablag‘ ajratgan.