АҚШнинг Виржиния штатидаги Ричмонд шаҳрида дунёдаги энг семиз мушуклардан бири қутқариб қолинди, деб хабар бермоқда “Правила жизни” нашри.
Патчи лақабли мушукнинг вазни 18,3 кг ни ташкил қилади, бу ўртача беш ёшли боланинг вазнига тўғри келади. Мушукнинг аввалги эгалари уни арзон озиқ-овқат ва ширинликлар билан ҳаддан ташқари тўйдирган, шу сабабли уй ҳайвони семириб кетган.
Патчининг қандай қилиб ҳайвонлар бошпанасига келиб қолгани аниқланмаган, бироқ бу ерда уни қаттиқ парҳезга ўтказишган. Ҳайвонларни назорат қилиш хизмати ижтимоий тармоқларда мушукнинг янги уй қидираётгани ҳақида хабар бериб, унинг суратларини тақдим этган. Мушукнинг потенциал эгасига битта муҳим шарт қўйилди: у уй ҳайвонининг соғлом вазнга қайтишига ёрдам бериши керак.
Патчи тезда ижтимоий тармоқларда ўз мухлисига эга бўлди ва мушукнинг янги эгаси уни бир кунда олиб кетди. Мушукни олиб кетиш учун икки киши керак бўлди. Ҳозирда Патчи соғлом ҳаётга қайтишига ёрдам берадиган уйини топди.
Гиннеснинг рекордлар китоби тарихидаги энг семиз мушук Австралияда яшаган Химми лақабли мушук ҳисобланади. Унинг вазни 21,3 кг бўлган, бу мушук 1986 йилда ўн ёшида вафот этган.
Изоҳ (0)