Аргентинада Мессининг рафиқасига тегишли дўконга қуролли ҳужум содир этилди. Жиноятчилар Лионелга хат қолдирган

Аргентинада Лионель Мессининг оиласига алоқадор супермаркетда отишма содир бўлди.

Маҳаллий вақт билан тонгги 3:20 да нотаниш шахслар томонидан Росарио шаҳридаги супермаркетлардан бирига қарата бир нечта ўқ узилган. Дўкон Лионель Мессининг рафиқаси Антонелла Рокуццонинг оиласига тегишли Unico тармоғига тегишли.

Жиноятчилар супермаркет эшиги тутқичига хат илиб кетган. Унда “ПСЖ” форвардига мурожаат қилинган. “Месси, биз сени кутамиз. Явкин (Росарио мери — изоҳ “Дарё”) — наркоман, у сенга ёрдам бермайди”, — дейилган хатда.

Infobae хабарига кўра, супермаркет бошқарувчилари бу вақтга қадар ҳеч қандай таҳдид ёки товламачиликка дуч келмаган. Полиция кўчадан 12 та гилза топган, металл тўсиқлардан 14 та ўқ изи топилган.

Дастлабки тахминларга кўра, жиноятни мототцикл минган икки эркак содир этган. Айни вақтда прокуратура бу иш билан шуғулланмоқда.

Аввалроқ “Росарио Сентрал” бош мураббийи Мигел Анхел Руссо ўйинчилар шаҳардаги нотинчлик сабаб клуб сафида ўйнашни истамаётганини айтган. Шаҳар мери бу гаплари учун мураббийни омма олдида танқид остига олганди.