Хонанда Манзуранинг ижод оламига кириб келганига 27 йил бўлди. Бу йил 45 ёшни қаршилаган ижодкор шу кунгача ўндан ортиқ хит қўшиқлар ва муваффақиятли ролларни ижро этди.
Беш ёшида ўзини кашф этган Манзура
Хонанда Манзура интервьюларида тўкис оилада улғайгани ва болалаги гўзал хотираларга бой ўтгани учун ота-онасидан миннатдор эканлигини таъкидллайди.
— Болалигим ҳақиқатан гўзал ўтган. Ўзим ҳам юзлари дўмбоқ, беғубор қиз бўлганман. Жуда кичиклигимдан бошлаб санъатга қизиқардим. Дадамнинг устахонасидаги жараён ҳам менга завқ улашарди, — дейди хонанда Манзура.
Манзуранинг отаси ўз даврининг таниқли рассомларидан бири бўлган. Шу боисдан ҳам Муборак Йўлдошев қизларидаги санъатга бўлган меҳрни эрта пайқайди. Беш ёшидаёқ қизидаги ноёб истеъдодни сезган ота, дўсти Каримхожи билан маслаҳатлашиб, уни Успенский номидаги мусиқа мактабига ўқишга беради. Ёш хонанда “Неймер” оркестри билан “Карубина” ариясини маҳорат билан куйлайди. Унинг овоз диапазони тенгдошларига нисбатан анча кучли эканли устозларини ҳам ҳайратлантиради.
Узоққа бормаган “Себону”
Ўзбек эстрадасида учлик гуруҳни “Сетора” билан боғлашади. Ундан аввал ўзбек эстрадасида “Себону” номли гуруҳ ташкил этилганди. Уч қиздан иборат гуруҳни илк бор Манзура опаси Нигина ва дугонаси Наргиза билан бирга 1996 йил тузишади. Иқтидорли хонанда Равшан Зокиров бошчилигида трио 2 та қўшиқ ёзиб, “Офарин-96” кўрик танловида 2-ўринни эгаллайди. Кутилмаган бурилиш ҳар уч ижодкорни ҳам қувонтирди. Натижада солист Манзура шу йили Успенский номидаги мусиқа мактабини тугатиб, Тошкент Давлат Консерваториясида ўқишни давом эттиради. У пайтга келиб гуруҳдаги Наргиза ўзини санъацҳуносликка бағишлайди. Омадли трио эса “Осиё” дуэтига айланди.
Нигина синглисини ёлғиз қолдирди
Опа-сингиллардан ташкил топган “Осиё” гуруҳи аввалига сермазмун ижод қилди. Бир йилдаёқ “Ёлғизим” номли альбомни тақдим этиб, икки қўшиғи оммалашди. Аммо опа-сингиллар ижодда кўп бор молиявий қийинчиликларга учрашарди. Қўшиқ ва клип яратиш учун фирмалардан ёрдам сўрар, доромадлари ҳаминқадар бўлса-да, борини ижодга сарфлашарди. Афсуски, 2000 йилга бориб Манзура ижодда ёлғизланиб қолди. Опаси Нигина келажагини бу соҳада кўролмай, ўзини дизайнерлик соҳасида синаб кўриш учун “Осиё”ни тарк этди. Шундан сўнг у клипмейкер, ҳозирда эса таниқли режиссёр бўлган Рустам Саъдиев билан ҳамкорлик қилишни бошлади. Продюсер билан ҳамкорлик хонандага катта омад ва машҳурлик келтирди.
Продюсери уни актрисага айлантирди
Манзуранинг танилишини кўпчилик “Тоҳир ва Зуҳра” фильмидаги “Манзура” қўшиғи ва унга ишланган клип билан боғлашади. Ноодатий имиж ва қўшиқ Манзуранинг одамлар ёдида қолишига сабаб бўлди.
2002 йили хонанда учун омадли келди. У “Ниҳол” номидаги давлат мукофотини қўлга киритди. Продюсери Рустам Саъдиев унинг актрисалик маҳоратини пайқаб, ўзи суратга олган “Муҳаббат синовлари” фильмига таклиф этди. Хонанда ижро этган рол ҳам, унга куйлаган саундтрек ҳам томошабинлар орасида оммалашади. Шундан сўнг актрисани фильм саундтрекларига ва сёмкаларига кўп таклиф этадиган бўлишди. Албатта, бунда продюсери Рустам Саъдиевнинг ҳиссаси катта.
“Сиздан бошқа совуқ юз тополмадик”
2007 йилда хонандани технологик фильм бўлган “Севгинатор”га таклиф этишади. 3 йил давомида Мунаввара Абдуллаевадан актёрлик маҳоратидан сабоқ олган Манзура иккита образни гавдалантириши керак эди.
— “Севгинатор”да рол ижро этишни унчалик истамаганман. Ҳатто эртаси куни сёмка дейилганда ҳам “Ўрнимга хонанда Лолани олинглар” деганман. Шунда режиссёр ёнимга келиб, “Сиздек совуқ юз бошқа йўқ-да” деган, — дейди хонанда Манзура.
Асирга олишгани ҳақида...
Хонанда интервьюларининг бирида у ва жамоасига қилинган суиқасд, жиддий шикаст етказишгани ва асирга олишгани ҳақида айтиб ўтган.
— Бундан йигирма йилча аввал тўйда жамоадаги болаларимни урмоқчи бўлиб, пичоқ билан келиб, ўлдириб юбормоқчи бўлишган. Мен ҳам жуда “духи” баланд қиз эдим. Отдан тушсам ҳам, эгардан тушмаганман. Улар нима деган бўлса, худди шундай жавоб қайтарганман. Ҳар хил гап-сўзлардан сўнг, улар бизни қўйиб юборишган. Улар бизни ўраб олиб, асир қилиб қўйишганди. Маъмуримни тепишган эди. Бундай ҳолатлар эсласак, кўп чиқаверади, — дейди хонанда.
Омадсиз тадбиркор
Хонанда Манзура опаси Нигина билан биргаликда “Манзура” либослар бутиги фаолиятини йўлга қўйганди. У либослар дизайни ва уларнинг рекламалари устида ишлаб, махсус фотосессиялар ҳам ўтказганди. Айниқса, турк фотографи Тайфун билан Бали оролида ўтказилган махсус фотосессияси кўплаб муҳокамаларга сабаб бўлганди.
— Баъзида қўшиқчиларнинг бошқа бизнеси бўлади. Бир хилларининг ота-онаси бой бўлади. Биз опам билан бошқа бизнес қила олмаганмиз. Клипларимга, рекламаларга ўзим пул тўлаганман. Булар учун ҳам катта пул сарфлаганман. Масалан, тўйдан пулни олиб, телевидениега бераман, шу пулни олиб режиссёрга, овоз ёзишга, хуллас, ўзимда кундалик харажатлар учун пул қолган, холос. Биз ҳам ҳар бир ўзбекка ўхшаб секин-секин уйнинг пулини бўлиб-бўлиб тўлашга сотиб олганмиз. Бирдан сотиб олишга имконимиз етмаган, — дейди хонанда.
Хонандани депрессияга туширган савол
Хонанда кейинги йилларда ҳаёт тарзидан тортиб, фикрлари ҳам бутунлай ўзгаргани ҳақида айтиб ўтади.
— 5-6 йил аввал қаттиқ депрессияга тушдим. Бунга сабаб одамларнинг “Қачон оила қурасиз? Фарзандли бўлолмай қоласиз? Ҳаётингизнинг мазмуни йўқолади”, деган гаплари сабаб бўлди. Шунда интернетга “ҳаёт мазмуни нима?” дея қидирув бердим. Бир маълумот эътиборимни тортди. “Мусулмонлар учун иймон ва итоат” деган гапни ўқиб, юрагим жунбушга келди. Шундан кейин фикрларим ҳам, ҳаётга бўлган қарашларим ҳам ўзгарди. Насиб этса, оила қуриб, фарзандли бўларман, — дейди хонанда Манзура.
Изоҳ (0)