Ижтимоий тармоқларда магистратура мутахассисликларига 2022/2023-ўқув йили қишки қабули натижалари қачон чиқиши юзасидан мурожаатлар кўпайди. Олий таълим, фан ва инновациялар вазирлиги қабул натижалари нега кечикаётганига изоҳ берди.
Унга кўра, магистратура қишки қабулига топширилган сертификатларни тегишли ташкилотлар базаларидан текшириш жараёни маълум вақт талаб этмоқда. Ҳозирги кунда ҳужжатларнинг асосий қисми текширилди.
“Бу жараён тез кунда якунига етказилади ва натижалар эълон қилинади”, — дейилади хабарда.
Олий таълим, фан ва инновациялар вазирлиги ижтимоий тармоқ фаолларидан ушбу мавзуга доир асосланмаган хабарларни тарқатмасликни, жамоатчиликдан эса фақат вазирлик расмий манбалари орқали эълон қилинадиган хабарларга ишонишни сўради.
Эслатиб ўтамиз, 2022/23-ўқув йили учун магистратурага қишки қабул 20 декабрдан бошланиб, 10 январгача давом этди. Ушбу танловда истисно тариқасида хорижий тилни билиш даражасидан қатъи назар сертификатга эга талабгорлар ҳам иштирок этишига рухсат этилди.
Изоҳ (0)