ФИФА 500 минг доллар зарар кўргани, Луи ван Галнинг норозилиги ҳақида. Алишер Никимбаев билан суҳбат

Футбол Алишер Никимбаев Жаҳон Чемпионатида ташкилотчилигидаги қийинчиликлар ҳақида гапирди.

Бизнинг асосий вазифамиз стадионлар талабларига жавоб бериш эди. Сизга бир мисол келтираман, эътибор берган бўлсангиз, 8 та стадиондан биттаси, «Ҳалифа» стадиони, енгил атлетикага мўлжалланган. Шу сабабдан стадион майдони атрофида жуда катта жой мавжуд. Захирада ўтирадиган футболчилар ва мураббийларнинг турадиган жойи майдондан сал узоқроқда жойлашиб қолганди.

Барча стадионларда бу масофа 8 метрдан узоқ бўлмаган. «Ҳалифа»да эса бу масофа 17 метр эди. Биз мухлислар ўтирадиган битта қаторни олиб ташлашга мажбур бўлдик. Битта қатор чипталари сотилмаган бўлса, «Ҳалифа»да 8 та ўйин ўтказилди, бу ФИФАга ярим миллион зарар келтирган. Битта қаторни ўзи шунча зарарга ишлаган.

Бу 17 метрга жамоалар баҳслашмади. Фақатгина Нидерландия терма жамоаси норозилик билдирди. 71 ёшли Луи ван Галнинг касаллиги ҳам бор, уни тушуниш керак. Бу 17 метр унга узоқлик қилган. У узоқ вақт тик оёқда тура олмас экан, шунинг учун сал яқинроққа суринглар, дея таклиф билдирди. Ҳаттоки 1 метрга сурмоқчи бўлсангиз ҳам, ҳамма кабелларни қайтадан улаш, барча ишлар қайтадан қилиниши лозим. Бу 2-3 кун вақтни оларди. Биз ван Галга ноилож рад жавобини бердик.

Алишер Никимбаев, футбол мутахассиси