Беларусь Республикасида 2023 йилнинг 4—14 август кунлари II МДҲ ўйинлари бўлиб ўтади.
МДҲга аъзо давлатлар вакиллари декабрь ойида Ҳамдўстлик мамлакатлари ўйинларига тайёргарлик кўриш ва уни ўтказиш бўйича ишчи гуруҳ йиғилишида мусобақа низомини тасдиқлаган.
МДҲ Ижроқўми матбуот хизмати хабарига кўра, II МДҲ ўйинлари 2023 йилнинг 4—14 август кунлари бўлиб ўтиши режалаштирилган. Ўйинлар Беларуснинг 11 шаҳрида 21 хил спорт тури бўйича ўтказилади.
Унда 3 мингдан ортиқ иштирокчи ва мутахассислар иштирок этиши кутилмоқда. Мусобақаларда Озарбайжон, Арманистон, Беларусь, Қозоғистон, Қирғизистон, Молдова, Россия, Тожикистон, Туркманистон ва Ўзбекистон спорт делегациялари иштирок этиши режалаштирилган. Мўғулистон, Хитой, Куба, Эрон, Уммон, Саудия Арабистони делегацияларининг айрим спорт турларида иштирок этиш масалалари ишлаб чиқилмоқда.
I МДҲ ўйинлари 2021 йилнинг 4—11 сентябрь кунлари Россиянинг Қозон шаҳрида бўлиб ўтган эди. Мусобақада МДҲнинг 9 давлати – Озарбайжон, Арманистон, Беларусь, Қозоғистон, Қирғизистон, Молдова, Россия, Тожикистон ва Ўзбекистон терма жамоаларидан 1000 нафардан ортиқ спортчи иштирок этган. Иштирокчилар спортнинг 16 тури бўйича 181 та медаллар жамланмаси учун ўзаро мусобақалашган эди.
Изоҳ (0)