Тошкент вилояти Янгийўл туманида тадбиркор 1,4 миллиард сўмлик электр энергиясидан ноқонуний фойдаланиб келаётгани аниқланди. Бу ҳақда Энергетика вазирлиги ахборот хизмати хабар берди.
«Ўзэнергоинспекция» ва ишчи гуруҳлар томонидан ўтказилган назорат тадбирида «Спринг Колоурс Индустрий» МЧЖга қарашли текстил маҳсулотларини ишлаб чиқарувчи корхона ўзбошимчалик билан электр энергиясига тўғридан-тўғри уланган ҳолда фойдалангани аниқланди.
Натижада 2,1 миллион кВт/соат ҳисобга олинмаган электр энергияси бўйича 1,4 миллиард сўм қайта ҳисоб амалга оширилган. Ушбу ҳажмдаги электр энергияси ўртача 10,5 мингта хонадоннинг бир ойлик истеъмолини ташкил қилади.
Қоидабузар истеъмолчига нисбатан белгиланган тартибда чоралар кўрилган. Электр энергиясидан ноқонуний фойдаланиш ҳолатларини аниқлаш бўйича назорат тадбирлари давом этмоқда.
Мавзуга доир: Энергетика вазирлиги газдан ноқонуний фойдаланган яна бир қатор заправкаларни аниқлади
Изоҳ (0)