Ўзбекистонда муомаладаги нақд пул миқдори камайишда давом этмоқда

Ўзбекистонда ноябрь ойида муомаладаги нақд пул миқдори 41,3 трлн сўмни ташкил қилди. Бу ҳақда «Дарё»га Марказий банк ҳисоботидан маълум бўлди.

Муомаладаги нақд пул миқдори ноябрда 2,4 трлн сўмга камайган. Бу миқдор октябрь ойида ҳам 8 млрд сўмга камайган эди.

Маълумотларга кўра, ноябрда миллий валютадаги пул массаси 300 млрд сўмга ошиб, 125,1 трлн сўмни ташкил этмоқда.

Шунингдек, октябрь ойида 46,5 трлн сўмни ташкил этган чет эл валютасидаги омонатлар 5,5 трлн сўмга кўпайиб 52 трлн сўмга етган.

Муомалага чиқарилган нақд пуллар май ойида 3,7 трлн сўмга кўпайган бўлса, июнь ойида бу кўрсаткич 3,6 трлн сўм бўлган эди.

Июль ойида нақд пул миқдори кўпайиши секинлашди ва 1,9 трлн сўмга ўсди. Август ойида эса февраль ойидан бери илк бор бу кўрсаткич камайди — 79 млрд сўмга.

Сентябрь ойида муомаладаги нақд пуллар 1,4 трлн сўмга кўпайиб, 43,786 трлн сўмга етганди.

Марказий банк томонидан жорий йилнинг дастлабки 6 ойи мобайнида муомалага қўшимча 13,6 трлн сўм нақд пуллар чиқарилган.

Аввалроқ Ўзбекистонда тўққиз ойда қанча пул банкоматлар орқали нақдлаштирилгани маълум бўлганди.