UzAuto Motors компаниясининг Ўзбекистондаги дилерлари Damas микровени ва Лабо кичик пикапи учун шартномалар тузишни вақтинча тўхтатди. Буни «Ўзавтосаноат» АЖ вакили «Дарё»га тасдиқлади.
Маълум қилинишича, компания томонидан мазкур ҳолат бўйича расмий баёнот берилиши кутилмоқда.
Damas ва Лабўга шартномалар тузиш 13 декабрдан бошлаб тўхтатилган. Буни УзАутосавдо иловаси ва тегишли ботдан ушбу автомобиллар таклифи олиб ташланганидан ҳам кўриш мумкин.
Бир неча кун аввал Lacetti ва Cobalt контрактацияси ҳам тўхтатилганди. Бироқ бу бўйича ҳам расмий баёнот берилмаган.
Айни пайтда УзАутосавдо иловаси ва компания махсус ботида таклиф қилинаётган энг арзон вариантдаги автомобиль нархи 152 миллион 996 минг сўмдан бошланадиган Onix бўлиб қолмоқда. Иловада Onix учун навбат 5 минг 300 та автомобилни ташкил этмоқда. Шартномалар 2023 йил 31 декабрь санасига қадар автомобиль етказиб бериш шарти билан тузилмоқда.
Эслатиб ўтамиз, компания 2023 йилда Cobalt ва Damas автомобилларининг ҳар бирини ишлаб чиқариш қувватини 150 минг донагача ошириб, Gentra ишлаб чиқаришни тўхтатишини маълум қилган.
Изоҳ (0)