Босфор ва Дарданелл бўғозлари орқали нефть олиб ўтиш учун рухсат берилишини кутиб турган танкерлар (суюқ ва ярим суюқ маҳсулотлар ташийдиган кемалар) сафи камая бошлади, деб хабар бермоқда Bloomberg кемачилик соҳасидаги турк амалдорига таяниб.
Манба маълумотларига кўра, 10 декабрда Туркия бўғозларидан ўтиш учун 27 та танкер навбатда турган бўлса, бир суткадан кейин уларнинг сони 19 тагача қисқарган.
Кўпчилигига Қозоғистон нефти ортилган танкерлардан иборат тирбандлик Туркиянинг ушбу танкерлар суғурта қилинганини тасдиқловчи маълумотнома талаб қилгани туфайли юзага келганди. 10 декабрь куни у суғурта компанияларига шундай хат намунасини юборган, бу эса муросага келинганини тахмин қилиш учун асос беради, деб ёзади Bloomberg.
Эслатиб ўтамиз, Туркия ҳудудий сувларида 5 декабрь куни кун давомида 19 та нефть танкерларидан иборат тирбандлик юзага келди, кемалар Россия нефтига нисбатан нарх чегараси кучга киргач, Босфор ва Дарданелл бўғозлари рейдларида лангар ташлаб тўхтаган. Ғарб давлатлари Туркияни Қора денгиз орқали нефть етказиб беришни тўхтатиб қўйганликда айблади. Тирбандликда қолган 20 га яқин танкердан 19 таси Қозоғистондан нефть олиб кетмоқда. Бироқ, на танкерлар, на уларнинг юклари нефть нархининг юқори чегарасига алоқадор эмас ва бу уларнинг суғурта ҳолатида ҳеч қандай ўзгариш бўлмаслигини таъминлайди. Нефть етказиб беришнинг кечикиши нарх чекловлари билан эмас, балки Анқаранинг ҳаракатларига боғлиқ. Туркия қирғоқлари яқинида турган кемалардаги нефтнинг катта қисми асли Қозоғистондан келган. Қозоғистон нефти Россияга қувур орқали келиб тушади ва Ғарб санкциялари таъсирига учрамайди. 5 декабрь куни Евроиттифоқнинг Россиядан нефть етказилишига нисбатан эмбарго жорий қилиш ҳақидаги қарори кучга кирди, у денгиз орқали ташиб келтирилаётган нефть учун нарх чегарасини белгилаш механизмини кўзда тутади. Россия нефтига нисбатан нарх чегараси 60 доллар деб белгиланди, уни келажакда ўзгартириш имконияти мавжуд. Қабул қилинган чекловлар Россия нефтини денгиз орқали ташиш билан боғлиқ хизматларнинг кенг ассортиментига тегишлидир.