Жанубий Корея фуқаролари расман бир-икки йилга «ёшаради»

Жанубий Корея ёшни ҳисоблаш бўйича анъанавий услубдан воз кечиш ва халқаро стандартга ўтиш ҳақида қонунлар қабул қилди, натижада унинг фуқаролари расмий ҳужжатларида 1 ёки 2 йилга «ёшаради». Бу ҳақда WIОNews хабар бермоқда.

Ҳозирги пайтда Жанубий Кореяда энг кенг тарқалган ҳисоблаш усули Корея ёш тизими бўлиб, унга кўра, одам туғилганида у бир ёшга кирган ҳисобланади. Шу билан бирга, Ой тақвими бўйича ҳар янги йилнинг биринчи кунида одамга яна бир ёш қўшилади.

Иккинчи усул ҳам бўлиб, унда одам ёши туғилганида нолдан бошланади, 1 январь куни эса бир ёш қўшилади. Бу тизимдан, одатда, чекиш ва спиртли ичимлик ичиш мумкин бўлган ёш чегарасига етган-етмаганликни ҳисоблашда фойдаланилади.

Шунингдек, мамлакатда стандарт халқаро тизим ҳам қўлланилади, бунда туғилганида ноль ёш ҳисобланиб, ҳар йили туғилган кунида бир ёшдан қўшиб борилади. У Жанубий Кореяда 1960 йилдан бошлаб тиббий ва юридик мақсадларда қўлланилади.

Юзага келган вазият танқидчилари бир йўла учта тизимдан фойдаланиш натижасида фуқароларга турли хизматлар кўрсатишда чалкашликларга учраш мумкинлигини, хатоларни тузатиш эса қўшимча харажатлар талаб қилишини айтган.

Энди 2023 йил июнидан бошлаб аҳолининг расмий ҳужжатлар айланмасида фақат халқаро тизимдан фойдаланилади ва Жанубий Корея фуқаролари бир йилга «ёшаради».